Photos super mi amate urbe de nascentia e del habitation Zalaegerszeg - 13.

Le sala de concertos e expositiones urban

Como se vide, illo era olim un synagoga, ma a causa del regrettabile eventos durante le secunde guerra mundial le judeos in mi urbe son tanto pauc, que illes non pote plenar iste edificio in function de un templo. Pro isto le edificio (que serviva como un magazin durante le communismo; ma non pro vender cosas, solmente pro immagazinar los) era facite un sala de expositiones e concertos; mesmo illo recipeva un organo, que non es usual in synagogas (functionante).

Le judeos in Zalaegerszeg viveva pauc in mi urbe del resto anque ante le guerra, io crede (de facto le urbe es quasi monocultural, hungare; il ha pauc de tsiganos in le urbe, como le sol minoritate; extra le judeos olim viveva hic etiam germanos, on dice al minus - ma illes ha perdite lor identitate e se inmisceva in le hungaros - ; e armenios, forsan. Hodie vive hic in le urbe ancora croatos con le origine del regiones plus sudic del contato, ma habente perdite lor identitate e non formante se, non organisante se a un gruppo cohesive como minoritate.

Photos super mi amate urbe de nascentia e del habitation Zalaegerszeg - 12.

Le statua de ZRÍNYI Miklós - in le croato Nikola Zrinski - ante le sede del autogovernamento urban

...nascito del contato Zala de olim, qui luctava bravemente contra le turcos durante le invasion ottoman, e era un eminente poeta hungarophone de su epocha. Ille habeva un identitate duple, ille era croato, ma al mesme tempore etiam hungaro, pois que ille luctava pro Hungaria contra le turcos, ille scribeva in le hungaro, etc. Ille es un commun heroe del croatos e hungaros (de novo un puncto, que collige le hungaros e le croatos); le hungaros es fer a ille, specialmente le habitantes de Zala (o forsan solmente le intellectuales...?) Dobro došli, hrvati! :-D (cuje lingua io non ancora parla, regrettabilemente, ben que in Zalaegerszeg il ha cursos del croato a nivello comenciante a plure scholas de linguas. E pro me le croato darea un clave ad altere linguas slave /principalmente al serbo, naturalmente, ma anque al sloveno e bulgaro e ancora al slovaco, checo - ben que le parentella e le intercomprension a iste linguas occidental-slave es un pauco plus distante - ben que non significantemente - pro un homine con base linguistic sud-slave/. Ma antea io ha planos evolver mi cognoscentias in le germano e anglese a nivellos ja acceptabile, attestate per papiros, que io los parla "a nivello medie"... :-) )

Photos super mi amate urbe de nascentia e del habitation Zalaegerszeg - 11.

Le anterior Casa del Contato, super le qual era cantate in le entrata precedente!

Isto es le un information audite / legite per me. Le altere es, que iste edificio serviva pro facer habitar soldatos in se. Io non sape, qual variante es juste.

Le Archivo Contatal se trova in le edificio vicin, que non se vide hic. Ille edificio es anque vetule, historic.

Nonobstante le pavietto / trottoir / sentiero ja pote apparer familiar pro vos, del pictura monstrante le placia Centrum. Iste photo es photographiate de ille placia, monstrante le altere latere del strata principal (nominate como quasi omne le stratas principal in Hungaria post Lajos Kossuth, cuje rolo in le historia de Hungaria in le XIXne seculo, inclusive le tempore del revolution in 1848 es difficile detaliar hic - brevemente).

Photos super mi amate urbe de nascentia e del habitation Zalaegerszeg - 10.

Le horologio public ante le sede del autogovernamento, in le strata principal de Zalaegerszeg.

Illo sona le melodia folkloric del contato Zala "Hallottad-e hírét Zalaegerszegnek?" ("Esque tu ha audite le fama de Zalaegerszeg?") in cata plen hora exacte (si non anque in cata medie e quarte hora, io non sape), que es un canto de prisioneros (anque jam al tempores "folkloric" era le prisa central del contato in Zalaegerszeg). Le melodia ha le characteristica le plus ancian in le musica folkloric hungare: illo ha un linea descendente in le construction del melodia, e illo es de origine pentatonic (pentatonic modificate in le prime parte, habente tonos "pien" - i. e. tonos non pentatonic, ma inaccentuate - e modificate duo vices per un medie tono; indicate per cruces in le notitia musical in basso; ma pentatonic pur in le secunde parte). Iste characteristica (pentatonic e descendente) representa le connexion e affinitate, mesmo parentela del hungaros con le populos nomade de origine turc del steppa eurasian. (Olim un tal populo era anque le bulgare - presta attention al parolas hun-gare, bul-gare - , ma illes habente trovate lor patria in le territorio del Bulgaria de hodie deveniva slavos, e abandonava lor original lingua turc e cambiava al linguage slave. E ora illes ja odia le turcos /illos de Turchia de ora/, pro que illes era le parte del Imperio Ottoman durante longe seculos...). Le origine scythic-hunnic-turc del gente hungare es facite oblidar, e iste action non se comenciava durante le communismo, ma ja in le epocha del Habsburges (reges habsburge nos habeva multe), in qual tempore comenciava le procession declarar le lingua hungare como un lingua finnougrian, e al mesme tempore negar le radices cultural e genetic non finnougrian, ma scythic-hunnic del hungaros, que son identic con le cultura del populos nomade del steppas eurasian; le qual cultura approxima nos i. a. etiam al cultura del uyguros (uyguros flave, i. e. yuguros) in China de Nord-West (illes conserva le plus le ancian cultura del ancian turcos e populos nomade con cavallos sur le steppas eurasian).

Le melodia es le sequente (presentate in "rubato" - sin rhythmo stricte; "andante"):

...e le texto es (on pote trovar clave al pronunciation in un mi previe entrata hic):

- Hallottad-e hírét Zalaegerszegnek;
Annak a nagy magas fekete teremnek?
- Hallottam, hallottam, szenvedtem is benne;
Verje meg az Isten, aki építtette!

Rab vagyok, rab vagyok, szabadulást várok;
A Jó Isten tudja, mikor szabadulok.

Szállj le páva, szállj le, vármegye házára,
a szegény raboknak szabadulására!

Leszállott a páva vármegye házára,
de nem ám a rabok szabadulására...

I. e. in interlingua:

- Ha tu audite le fama de Zalaegerszeg,
illo de ille grande, alte sala nigre?
- Si, io lo ha audite, mesmo io ha suffrite in illo;
Que le Deo puni lo qui lo ha facite construer!

Io so prisionero, io attende mi liberation;
(ma) Solo le Bon Deo sape, quando io va ser liberate!

Descende, pavon, que tu descende al Domo de Contato;
pro le liberation del prisioneros regrettabile!

Le pavon ha descendite al Casa del Contato,
ma non pro le liberation del prisioneros regrettabile...

Photos super mi amate urbe de nascentia e del habitation Zalaegerszeg - 9.

...e hic se vide de novo le strata principal (de facto le placia Centrum), ma hic fortunatemente sin le fede edificio socialista del governamento local non plus socialista, trovabile plus al sud sur le strata. Isto es ancora le initio del strata; sur le photo se vide anque le Grande Templo (de facto le Zalaegerszeg historic - alora ancora solmente Egerszeg - era nascite circa illo). Le edificio rubie es illo del cinema. Le prime edificio del strata del latere sinistre (le secunde, post le edificio verde contra le Grande Templo) es le Hotel Arany Bárány (le hotel adressate al Agno Auree), ante le qual es un station de autobuses. Il es interessante, que le plus vetules dice le un al altere in le autobus, que illes descende "al Agno Auree", durante que le plus juvenes dice, que illes descende al McDonald's (lo que se trova al etage basse del hotel Agno Auree), que se construeva ibi multe post quando le hotel ja existeva.

Photos super mi amate urbe de nascentia e del habitation Zalaegerszeg - 8.

Un latere del centro del urbe

...photographiate del altere strata, que es undirectional (memora lo que io ha narrate hic in connexion con le strata principal parallel con isto, sub le photo del sede del governamento local...). Io pensa, isto es un vetule photo; io ha le sentimento, que le edificios hic ja son renovate desde alora. Le turres del Grande Templo se vide de un altere latere, que sur le photo ja presentate hic.

Photos super mi amate urbe de nascentia e del habitation Zalaegerszeg - 7.

Le fontana in forma de un tulipan; stante sur le Placia Ornamentate

Le Placia Ornamentate jace justo contra le governamento urban (al altere latere del strata principal), presentate sur duo photos anteriormente; e a dextere de iste photo vos pote vider un latere del Casas Dentellic, ja anque presentate sur un photo hic. Como io ha scribite, iste urbe es micre... :) In le centro se condensa quasi omne le curiositates del urbe, e extra le centro se trova pauc curiositates (ben que io va tosto monstrar etiam curiositates extra le centro ... ma ibi se trova plus tosto principalmente grande edificios de habitar con 10 etages o minus, construite in le stilo "baroc" del socialismo... :) ).

Photos super mi amate urbe de nascentia e del habitation Zalaegerszeg - 6.

"Le Puera Dansante" - statua stante ante le theatro HEVESI Sándor (un theatro con proprie compania ja desde le initio).

Photos super mi amate urbe de nascentia e del habitation Zalaegerszeg - 5.

Panorama de Zalaegerszeg, un urbe construite in le corde del paisage de collinas Göcsej (contato Zala).

Photos super mi amate urbe de nascentia e del habitation Zalaegerszeg - 4.

Isto es un altere vista al edificio del governamento urban de Zalaegerszeg.

Ben que anque iste edificio olim era create in stilo del "baroco socialista", le governamento in illo es sub le direction de un burgomaestro, qui non es socialista (malgrado que le actual governamento national de Hungaria es socialista), ma pertine al circulo del partito conservative FIDESZ. Del resto le edificio es facite plus belle desde alora - ma solmente in le interior...

Photos super mi amate urbe de nascentia e del habitation Zalaegerszeg - 3.

Un imagine del strata principal de Zalaegerszeg con le edificio del governamento urban.

On ha planos ja desde longe facer iste strata undirectional a un strata exclusivemente pro pedones, ma le veritate es, que Zalaegerszeg se construeva inter collinas, assi iste micre urbe non pote expander se plus; pro isto le stratas parallel non pote ser transformate a un strata bidirectional, proque le traffico deveniva tanto plus vigle in le ultime tempore, que in le caso del introduction del traffico bidirectional in le strata parallel le traffico de Zalaegerszeg se collaberea.

Totevia il ha un grande traffico de pedones sur iste strata, pro isto on introduceva recentemente un limitation de 30 km/h pro le autos (como vos pote vider le circulos sur le strata mesme, con le numero "30" pingite - ben que illo non se vide sur le photo a un maniera legibile).

Photos super mi amate urbe de nascentia e del habitation Zalaegerszeg - 2.

Le parte superior del ecclesia Maria Magdalena, le assi nominate "Templo Grande" de Zalaegerszeg. Illo era construite al fin del 1700s, naturalmente in stilo baroc.

http://zalaegerszeg.blogspot.com ... ma que es Zalaegerszeg...?!

Io pensa necessari presentar un poco mi urbe de nascentia Zalaegerszeg, ubi io vive, pois que io ha seligite su nomine pro esser le nomine de iste blog.

Un presentation textual va sequer postea (secundo le

pagina esperantophone super mi urbe (http://www.gportal.hu/portal/zalaegerszeg)

que es un multo bon pagina secundo me; si nos poteva traducer lo in interlingua o facer un simile, illo haberea certo un effecto touristic!), ora seque solmente alicun imagines (photos).

Le prime monstra le famose "domos dentellic" in le centro del urbe, que es unic (o quasi unic) in Hungaria (ben que illo es un "ja acceptabile" effortio del architectura socialista, le qual architectura characterisa regrettabilemente tote le Zalaegerszeg).

 

Sur le photo (o pictura...?) se vide Nicolas Horthy de Nagybánya; admiral, le governator de Hungaria.

Ille, como governator (le tertie ex le quales ageva pro Hungaria - le prime era János Hunyadi, qui olim vinceva le turcos, assi salvante Europa del West de esser le parte del imperio ottoman; le secunde era Lajos Kossuth) faceva toto, que ille poteva pro su nation e ille resisteva le requirimentos del germanos nazista si longe, como illo era possibile in ille epocha guerral. E ille non odiava le judeos, mesmo ille ha salvate alicunos, pro lo que un gruppo de judeos es grate a ille. (Ma isto non es tal publicate, como le propaganda de altere judeos e circulos de liberales-extremistas, qui le presenta como un nazista e/o antisemita.)

In cetero le persecution de judeos non occurreva in Hungaria pro que ille era le governator, ma illo era causate per le functionamento del consilio de ministros hungarista-nazista sub le direction de Gyula Gömbös, a cuje nomination como prime ministro Horthy, le governator era fortiate per le germanos.

Horthy habeva grande meritos in lo que Hungaria e su nation spiritualmente e physicamente (economicamente, etc.) superviveva le grandissime choc del decision de Trianon, que robava le duo tertio (2/3) del territorio hungare in 1920-21; inter alteres per le nomination de Kuno Klebelsberg como ministro cultural. (Io non pote inserer hic plus que un photo adequatemente, pro isto vole ben vider su photo hic.)

Il es anque ver, que Hungaria perdeva le secunde guerra mundial pro le troppo caute comportamento de Horthy. Romania succede saltar ex le guerra de plus bon hora, quando ja se videva, que Germania va perder le guerra. Al mesme tempore Hungaria es nominate in estraniero como "le ultime satellite" de Germania (nazista) (forsan anque ora illo es nominate assi...?), pois que Hungaria sub le direction de Horthy remaneva al latere del germanos. Ma proque...? Proque il era promittite, que le frontieras del Hungaria historic va ser re-establite, si Germania vince (e iste re-establimento ja era partialmente realisate per le decisiones de Vienna nr. 1 e 2. in 1938 e 1940). Ecce le causa, proque Horthy remaneva al latere del germanos, e non ulle "antisemitismo" o "appoio del ideologia nazista" de ille o del nation hungare.

Super le rehabilitation o altere judicamento de Horthy il es un grande silentio in le pais. Nulle partito politic annuncia, interprende, representa isto, forsan pro que illos time de lo que illos va ser stigmatisate como "nazistas", "extremistas de dextere", "antisemitas"; justo pro le miscomprension concernente Horthy detaliate supra...? Solmente un partito radical del dextera probava facer le processo de rehabilitar un su prime ministro Bárdossy, qui era exequite / executate; ma habente vidite, que isto non succede, illo non probava facer lo mesme con Horthy a fin de attinger in le societate hungare un altere judicamento de ille.

Que le estranieros (non-hungaros, non-hungarianos) sape e opina super ille?

"Hallo! Hallo!" Ma...de ubi origina iste parola...?

Esque vos sape, que un del plus sovente parolas de nostre epocha moderne de telecommunication "hallo" origina del parola (phrase) hungare "Hallod?" ("Esque tu lo audi?") Quando Tivadar Puskás (pron. Pushkaash) presentava su invention ante un grande publico, le central telephonic, ille usava un de iste expressiones: "Hallod?" ("Esque tu lo audi?") o "Hallom!" (Io lo audi.) Le occidentales apprendeva immediatemente iste parola e comenciava usar lo postea in lor communicationes telephonic.

Fonte: "Verda Lando", le blog esperantophone de "Karesema" (il sembla, que le entrata es removite desde alora - nota de P. K. in augusto 2006). Illa apprendeva le information de un revista de esperanto.

Io mesme anque non sapeva isto, io lo ha legite justo ora, ante minutas.

Io ha referite super le invention de Tivadar Puskás e super le inventiones de altere hungaros in mi presentation in Asa, Svedia, in le quadros del conferentia international de interlingua. (Le presentation se lege hic, ma si alicuno vole, io va inviar le o la un version pdf augmentate con le photos presentate in Svedia). Iste referentia al origine del parola "Hallo!" in connexion con le invention hungare del central telephonic io non ancora ha sapite, pro isto illo non se trova in iste documento, naturalmente.

Nos pote observar hic un augmentation del signification: in le germano on usa iste parola non solmente pro telephonar, ma in le senso "Salute!"; equalmente, como in le anglese on usa le "Hello!".

Dunque de facto milliardos de homines usa iste parola de origine hungare cata die e assatis soventemente intra un die!

Il era un philosopho german, J. G. Herder in le 18ve seculo, qui prophetisava le disparition del lingua hungare. On pote vider, ille non habeva ration. Si totevia ille haberea ration, anque alora al minus iste parola hungare superviverea!

Comparation de traditiones bulgare e hungare de origine prechristian

Pro plenmente comprender iste mi articulo on debe antea leger le documento sub le ligamine a basso.

Stefka Yoncheva in su presentation in Asa, Svedia, al occasion del conferentia international de interlingua (que se lege hic) diceva:

>> Como on pote facilemente notar, iste ritos ancian porta le detalios de un passato pagan. Le christianisation de Europa ha rarmente succedite a reimplaciar o a demolir tal ritos, e isto es ancora plus pronunciate sur le Balkanes, ubi le christianismo orthodoxe es imponite relativemente tarde foras le imperio byzantin. Tal ritos existe mesmo hodie in tote le peninsula, plus o minus celate e ligate al sanctos, ma lor ver natura pagan es evidente. Nos crede que iste traditiones es un parte multo importante de nostre identitate tanto national quanto individual, e il es un ver placer condivider los con vos.<<

Illa ha ration; pro le christianismo era/es multo difficile "vincer" iste traditiones pagan in Europa; non solmente sur le Balkanes, ma in tote le Europa. Mesmo le ecclesia roman catholic ipse ha incorporate multe elementos, tractos pagan (inclusive le festa del dominica in vice del festa del sabbato de origine purmente biblic in le tempores ancian-christian e inclusive le festa del natal le 25 de decembre, le tempore del solstitio hibernal) pro poter superviver e pro poter esser regente mentalmente e politicamente in Europa. Ma post le incorporation de iste elementos illos deveniva dogmatic e le ecclesia non plus voleva/poteva incorporar, mesmo permitter plus de traditiones pagan (vide le persecutiones de magas in le medievo). In Hungaria le situation era, que le ecclesia (roman catholic) a vices persequeva, a vices permitteva iste modeste actiones folkloric de origine pagan foris del muros del templo, o faceva assi, quasi illo non serea consciente super illos; ma nullemente los incorporava (in le rituales intra le muros del templo). Le hungaros ha p. ex. tal "superstitiones" (assi in le conception official del ecclesia), que al pentecoste in le levante sol on vide le matre del Deo, Maria (illa es nominate "Babba Maria", in connection con le parola ancian summerian "babba" o "Boldogasszony" i.e. "Femina Felice", secundo un summerologo hungare in connection con le expression summerian "bou-dug ashan") e in le semines (granas) del nove frumento on vide le imagine del Sol, i.e. le facie de Christo. Mesmo reformatos hungare (= credentes del ecclesia reformate) crede iste recente, "inofficialmente". Quando le ecclesia persequeva tal credentias pagan, alora le versos folkloric hungare de infantes (textos de joco recitate rhythmicamente) conservava iste credentias, traditiones, rituales pagan.

Le differentia inter le ecclesias roman e grec (e orthodoxe, "pravoslave") es secundo me, que le ecclesia(s) grec (e/o orthodoxe) mesmo assisteva in iste actiones de origine pagan (foris del muros ecclesial, ma forsan anque intra le muros) e isto ben monstra se in le discussion de Stefka super le nestinarios; le nestinarios recipeva le objectos cultic del ecclesia, etc. E io ha audite, que in Romania le pastores orthodoxe cura gentes per medios, per methodos non del medicina moderne, ma con illos del medicina ancian, "natural".

Stefka ha dicite (e scribite), que le femina nestinario cade in trance durante le ritual e illa face movimentos intertanto, como le shamanes lo face. Forsan uno interessa, esque anque le hungaros habeva shamanes in le ancian tempores. Expertos dice: non jammais; le hungaros habeva "táltos"-es (taltos, pron.: taaltosh), qui de facto era pastores, magos e non shamanes. Le plus significante differentia inter un táltos hungare e un shaman es, que dum le shamanes face grande movimentos durante le ritual, le táltos non se move durante le ceremonias (dunque le movimento non es parte de effectualisar le action, non es parte del effecto religional desirate), como le pastores christian non dansa durante le rituales christian.

Del resto sonar cornamusa in contexto, scopo religiose era un cosa usual anque inter le hungaros, anque in le templos durante alicun dies festive (quando on ja habeva organo in le templo; ante le organo le cornamusa era le instrumento del templo in le medievo); mesmo on dansava in le templo al musica del cornamusa alora; ma non solmente in le templo on dansava, ma anque al ceremonias funeral in le cemeterios (lo que faceva solmente le tsiganos e le rumanos recentemente, non plus le hungaros)! Mesmo in mi contato (Zala) in le ancian tempores le "festa" funeral (ante le interramento) al casa del morite occurreva assi, que le morite era erigite, o sedite in le angulo del camera, durante que le co-familianos e le invitatos mangiava, cantava, mesmo dansava. Alora repasto era dividite anque pro le morite (illo era ponite ante le morite). Anque iste traditiones monstra fortemente lor radices pagan.

Si alicuno ha qualcosa a reager a iste mi littera (justificar o negar, o supplementar iste cosas, p.ex. viste le parallelas a su proprie nation, si illos existe), illo serea benvenite per me.

Le lingua hungare

(Recommendate al quales, le quales nihil, o pauc sape super le lingua hungare).

Comenciante iste thema io cita (in hungaro) le assertiones del linguista Sir John Bowling:

"A magyar nyelv eredete nagyon messzire megy vissza. Rendkívül különleges módon fejlődött és struktúrája visszanyúlik arra az időre, mikor még a jelenleg Európában beszélt nyelvek nem léteztek. A magyar nyelv egy tömör kődarab, melyen a viharok a legcsekélyebb karcolást sem hagyták. Nincs szüksége senkire, nem kölcsönöz s nem von vissza, nem ad és nem vesz el senkitől. Ez a nyelv a legrégibb, a legdicsőségesebb monumentje egy nemzeti egyeduralomnak és szellemi függetlenségnek. Amit a tudósok nem tudnak megoldani, elhanyagolják, úgy a nyelvkutatásban, mint a régészetben… A magyar nyelv eredete ennél ((az egyiptomi templomok építésének csodálatosságánál)) sokkal csodálatosabb fenomén. Aki megoldja, isteni titkot fog analizálni és a titkok első tézise ez: Kezdetben vala a szó és a szó Istennél volt és a szó lett az Isten."

Clave a pronunciation:

a = inter "a" e "o"

gy = dy (dj, d', etc.)

ny = ny (nj)

e = german "ae" o "ä", dunque non le german "e", sed un poc plus aperite

ssz = german "ß" o "ss"; pronunciante le ss /ß/ plus longemente

í = ii (german "ih" - hic le "h" servi, como "Dehnungs-H" -; german "ie" )

s = sh (german "sch", slave "š")

ó = oo (german "oh")

ő = öö (german "öh")

ú = uu (german "uh")

á = aa (german "ah")

é = german "ee" o "eh"; plus longemente pronunciante le german "e"

z = z (german "s")

ly = -y- (j)

cs = tch, ch (german "tsch", slave "č")

bb = bb, dunque plus longemente pronunciante le "b"

sz = s (german "ß", dunque non le german "s"!)

t+j = ty (tj, t')

nn = nn (plus longemente pronunciante le "n")

kk = kk (plus longemente pronunciante le "k")

d+j = dy (dj, d', etc.)

Le accento sta sempre (dunque sin exception) sur le prime syllaba!

On pote leger e ascoltar un altere texto (le prime in le vice) in le hungaro, traducite e dicite per me al loco.

E nunc ecce le traduction:

>>Le origine del lingua hungare i retro a un tempore multo distante. Illo se ha disveloppate secundo un maniera extrememente special, e su structura i retro a un tempore, quando le linguas parlate nunc in Europa non ancora existeva. Le lingua hungare es un dense pecia de petra, sur le quales le tempestas non lassava mesmo le plus micre grattatura. Illo besonia nihil, illo non presta e non reprende, non da e non deprende. Iste lingua es le monumento plus vetule, plus gloriose de un autonomia national e de un independentia spiritual. Lo que le scientistas non pote solver illes neglige, como in le exploration linguistic, assi anque in le archeologia... Le origine del lingua hungare es un phenomeno multe plus admirabile, que le miraculo del construction del templos egyptie. Qui lo solve, va analysar un secreto divin e le prime these del secreto va esser: “Al comenciamento era le parola e le parola era a Deo, e Deo deveniva le parola.”<<

Si, le hungaro pare esser un multo ancian linguage, mesmo on dice, ha le mesme radices con le summeriano (multe summerologos hungare ha scribite re isto, p. ex. prof. BADINY-JÓS Ferenc o BOGULA Ida, sed pro certe causas on non poterea trovar lor nomines in le rete, al maximo on poterea trovar los sur alicun paginas hungarophone), e monstra affinitate (parentela) a linguas ancian-turc e finno-ugric, ma declarar le hungaro EXCLUSIVEMENTE como un lingua finno-ugric (ugric) esseva un grandissime error. Mesmo ancora solmente in sonoritate le hungaro sta inter le finnese e turco.

Mesme nostre original scriptura, le scriptura runic (que ha nihil commun con illo de germanos) ha le origine ancian-turc (mesmo le hunnos e scythos habeva quasi le mesme scriptura, que nos!). Pro plus multe saper re nostre original scriptura runic vide le paginas interretiari 1. e 2.

Le hungaro es un lingua agglutinante

(vide "meg-veszteg-et-het-etlen-ség-es-ked-és-e-i-tek-ért" = 'pro vostre continue actiones monstrante incorruptibilitate'; lo que es _UN_ parola!).

Agglutinante pote esser linguas de qualcunque origine (p. ex. del familia turc o finno-ugric, etc.). (Le summeriano es plus tosto incorporante.) Tamen officialmente le hungaro pertine al ugric branca del lingua-familia finno-ugric, dunque le linguas manyshi e chanti (vogulo es ostiaco) sta plus proxime al hungaro, que linguas del permi ("komi" / "udmurt", "mari" / "tcheremis", etc.) o illos del finnic (estoniano, finnese, "liv", "vot", etc.) branca.

Un grande differentia in le aspecto del hungaro e de un lingua indo-europee (principalmente le germano) es, que le notion, o le cosa, le qual on vole pronunciar, sta (como mesme le accento del parolas) al initio del construction phrasal:

"A magyar nyelv eredete nagyon messzire megy vissza. Rendkívül különleges módon fejlődött..."

Ora io livra duo traductiones secundo le original sequentia; compara lo con le sequentia del traduction superior.

In le prime io elimina le morphemas (suffixos, postpositiones) hungare, le quales non es traducibile in interlingua, nam illos non se usa in illo, ma conveni in illo a prepositiones; in le secundo io explica le elementos mancante del prime. In le prime on pote plus ben observar le sequentia differente del hungaro, differente del linguas indo-europee: le hungaro pone le cosas essential a avante, dum le linguas indo-europee al fin del phrase.

"Le hungare lingua-origine multo distante i retro. 'Multo' extraordinari-maniere-mente evolveva..."

"Le hungare lingua[-]origine[+ le suffixo "-e" del relation possessive in singular 3e persona] multo 'distante a' [o 'a distante': le 'a' servi hic pro indicar le direction] i retro. 'Multo' extraordinari[-]maniere-mente evolveva [sin "illo", que pare in le suffixo]..."

etc.; on poterea monstrar de facto omne le phrases hungarophone como exemplos.

Mi intentiones con iste blog, le characteristica de iste blog

Salute, amicos!

Io va facer plus de notitias hic del typo "diario", de plus anque mi personal experientias, pensatas e traductiones. Io vole exprimer hic mi opiniones sinceremente e io vole presentar le realitate in le mundo e in Hungaria. Forsan io va usar parolas un poco plus drastic, va formular un poco plus rectemente; io spera, io non va offender hic alicuno per isto; si totevia, vole ben pardonar me. Io pensa, iste foro es bon anque pro presentar Hungaria e le cultura hungare sinceremente pro le large mundo e io sape, isto non ancora es attingibile in interlingua. Iste blog sera bon forsan anque pro corriger le informationes false, forsan anque negative in le Europa de West e in le mundo super le hungaros, super le cultura, lingua, traditiones hungare e super Hungaria e su historia, etc. Ma naturalmente non solmente entratas con le thema hungare va trovar se hic, ma qualcunque cosas, le quales es interessante pro me e super le quales io pensa, que isto pote ser interessante anque pro alteres. Anque de plus vos pote expectar de me articulos de novas de un characteristica un poco minus seriose, como vos es ja accostumate al characteristica del blog de Internodio. Io non vole ser mi proprie concurrentia, mesmo non illo de Martijn Dekker, pro isto io pote assecurar totos, que nostre blog con Martijn, Internodio va remaner e io va actualisar lo parallelmente insimul con isto per le nove entratas de hic, le quales conveni al characteristica de Internodio (i.e.: novas de un sorta un poco minus seriose, con minus de politica...)

Io expecta vostre commentarios a cata un de mi entratas!

Ma, pro formular sinceremente, io non jammais era un typo scribente diario... anque non in le tempore precomputatorial e preinterretiari. Pro isto sera hic periodos, quando io non actualisa regularmente mi blog. In iste caso mi vetule entratas (il ha multes!) sta a vostre disposition a leger (o releger los plus attentivemente); e - a comentar! (Ma io me hastara, naturalmente.)

Con salutes amical:

Péter Kovács

Proque io votava pro interlingua in un pagina de rete?

Existe un pagina in le rete, ubi on pote votar pro su lingua preferite a esser un lingua global pro le communication international (dunque non del toto in vista de nostre linguas materne!). On pote (o debe?) explicar le causa, proque on votava in favor del lingua seligite. Ecce mi argumentos scribite ibi in favor de interlingua:

INTERLINGUA ES LE DENOMINATOR COMMUN DE LINGUAS EUROPEE LE PLUS PARLATE IN LE MUNDO (ANGLESE, ESPANIOL, PORTUGESE, FRANCESE, ITALIANO, GERMANO E RUSSO) IN VISTA DE LOR VOCABULARIO COMMUN, HEREDITATE DEL LATINO E GRECO ANCIAN. (PRO ISTO ILLO ES MULTO APTE A ESSER ANQUE UN LINGUA AUXILIAR DEL SCIENTIA.) PRO MILLIONES DE HOMINES INTERLINGUA ES COMPRENSIBILE AL PRIME AUDIENTIA, PRIME LECTURA SIN STUDIOS PREVIE! CON ILLO ON COMPRENDE TEXTOS IN LINGUAS NEOLATIN, MESMO ANGLESE, SIN STUDIANTE ANTEA ISTE LINGUAS, SOLMENTE INTERLINGUA! VOCABULARIO LE PLUS INTERNATIONAL CON UN GRAMMATICA MINIMAL!

Ascolta le texto!

Pyramide in Hungaria = pyramide in Europa?

Le Cavitate al Claro de Luna photographiate de supra

Levente Szörényi (pron. Ssöreenyi), un famose cantator hungare faceva un curso in Héviz (pron. Heeviz; un urbe micre hungare famose con stabilimento thermal, ibi ille esseva curate durante le tote novembre) super le excavationes dirigite per ille in le Cavitate (Trenschea? Conducto? Fossato? Sectura? Dica?) de Claro de Luna, trovabile in le monte Pilis (pron. Pilish). In le annos del decennio mille novem centos quaranta un archeologo nominate Sashegyi (pron. Shash-hedyi) commenciava excavationes ibi, iniciate per le scription de Anonymus (un scriptor con pseudonymo del rege hungare Bela): le tumba de Árpád (pron. Aarpaad) se trova ibi, “ubi le aqua flue a basso in un bassino de rocca (de petras)”. (Árpád esseva le duce – prince, raja, monarcha, etc. - del hungaros, qui guidava su populo in le nove patria circa le 895e anno p. Ch.)

Iste description totalmente conveni al Cavitate (?) de Claro de Luna, que se trova in le Pilis; ubi on suspecta le ancian urbe del reges hungare: Fehérvár (pron. Feheervaar; in le latino Alba Iulia – Urbe Blance) e Buda Ancian, le sede de nostre grande rege Attila. (Existe duo urbes nunc in Hungaria nominate Fehérvár /Székesfehérvár; pron. Sseekeshfeheervaar/ e Buda /nunc unificate con Pest, como un latere del capital Budapest/, ma istos non es le duo urbes ancian original.) Sashegyi trovava etiam un sceleto feminin ibi, in un loco periculose al vita e a approchar, in un sarcophago de petra, cuje substantia genetic es idente con illos del hungaras (e hungaros) repatriate circa le annos 895-896 in le territorio del Hungaria Historic plus tarde. Le patre de Szörényi laborava al Interprisa Cartographic Hungare, e habeva contacto con Sashegyi. Le signatura al mappas del Trenschea (?) del Claro de Luna como “loco ancian cultic” es regratiabile a ille. Iste signatura remaneva sur le cartas geographic durante le communismo e anque sur le cartas de nunc. Le petras trovabile ibi se refere ad intervention human, non le natura los formava tal. In un arbusto proxime Sashegyi trovava etiam un statua illustrante un homine, le qual monstrava tractos del populos de Asia Interne – turcos, scythos, hunnos, etc.; dunque le tractos del gentes, le quales es considerate como parentes, respectivemente ancianos del hungaros. Ille retornava a ille loco post duo dies insimul con duo expertos, ma le statua dispareva de ibi. Ille se informava super le cosa, e il se verificava, que illo esseva levate al petreria; illo esseva devenite fracassate...

Le loco (o le circumstantia...?) periculose del excavationes

Le circulo de Szörényi (como un association) recommenciava le excavationes circa 2003, sur le loco vicin a illo, ubi le sceleto feminin esseva trovate per Sashegyi. Hic esseva trovate le ossos de un animal con un character de ulle bove, que non es trovabile nunc in Hungaria. Extra isto illes trovava un articulo (junctura, phalange) de un digito de pede feminin. Illes vadeva al urbe Szeged (pron.: Sseged) in le institution in le die sequente iste curso pro facer examinar le tractos genetic de iste osso. Que occureva desde illo, io non sape, ma il es probabile, que on lo identificava como un osso feminin del epocha del ultime repatriation hungare (in 895-896 p. Ch.). In iste caso il ha nulle dubita, que illo es un parte del ossatura trovate per Sashegyi. (Que occureva con le ossatura? Io non sape.)

Le partes professional del excavationes es dirigite per un archeologo professional. Le localitate debe esser immaginate assi, que illo es de facto un monte, al qual basso flue le rivo (o riviera). Le excavantes trovava un tal bloco de petra, quando illes forava plus a basso, que ha un margine ostentatiosemente incisive, recte; regularisate in un maniera. Habente continuate le linia de iste margine illo habeva le fin assi, que le pala collideva (confligeva) de nove in un petra, le qual esseva de nove un margine regular de un bloco de petra de forma cubic o briccal. A su fin se trova etiam un margine perpendicular a illo, dunque le toto se refere de creation human, a un construction scalonate. On non pote saper, ubi es le fin de iste processo scalonate, ma illo pote continuar se mesmo usque le rivo / riviera a basso. E si on trova le mesme construction al latere parallel del monte, alora isto pote esser nihil altere, que un pyramide, le qual esseva forate de un monte, ma plus tarde illo esseva etiam recoperite como un monte de alicun causa.

Isto appoiarea le supposition, que se concerne a lo que il valerea cercar le cemeterio cultic de nostre ancianos hungare (reconquirente iste pais; mesmo eventualmente le tumba de Árpád, etiam secundo le description del chronista) hic. E il poterea haber solmente un bon effecto al nation hungare, al solidaritate, cohesion del nation, si illo haberea un tal loco de pelegrinage, ubi nos poterea peregrinar al ancianos – diceva Levente Szörényi; addente, que evidentemente non omnes pote haber iste mesme interesse (vide: le recoperir del pyramide, le fracassar del statua human in le petreria, le silentio o altere, false clarification professional del discopertas de Sashegyi – si io ben sape, ille ha etiam trovate skeleto de un cavallo illac).

Le plano excavatori existe usque le sequente estate [i.e.: le estate de 2005]; usque alora le territorio era incirculate, le fossas era coperite per lignos e era scribite ibi pro proteger le gentes, que le territorio es periculose al vita.

Anque se parlava super Özséb (pron. Öjeeb; Eusebio), qui abandonante su bon position ecclesiastic iva in le montania Pilis, ubi ille viveva in un grotta durante tres annos, pois ille fundava le ordine monachal paulin; le sol ordine de fundation hungare. Interessantemente illo conserva multe elementos del ancian religion hungare e le monachos usava le scripto runic hungare inter se. Secundo Szörényi durante iste tres annos debeva occurrer qualcosa, que orientava Özséb in iste direction; p. ex. ille forsan incontrava con le representantes del ancian religion hungare - le quales poteva guardar iste tumba ancora in le medievo -, con le quales ille forsan discuteva personalmente super questiones de credentia e le un latere poteva essayar convincer le altere. Eusebio poteva convincer iste eremitas p. ex. super lo que iste mundo passate (illo del vetule credentia) es finite, il es actual pro illes connecter se al nove credentia. On non sape, que era le prime monachos paulin, dunque le fundatores del ordine paulin. Forsan illos guardante le tumba, illos del vetule credentia - Szörényi opina.

Qui esseva le effractor?

Hamburg (mti) – Le policieros ha capturate un effractor causante seriose damnos in un appartamento. In le unitate local del Policia le alarmator del appartamento signava, que occurreva un entrata inautorisate. Le patrulia videva, que le texturas de plure mobiles e le cortinas obscurante del fenestras esseva rumpite in partes per un delinquente incognoscite, de plus esseva rumpite un aquario, cuje pisces jaceva sin ordine in le appartamento. Finalmente on trovava le delinquente sub le pulpito del cocina: illo esseva un catto robuste.

Ascolta le texto!

Sanguine de crocodilo contra le virus VIH?

Sydney (mti) – Le sanguine de crocodilo occide le virus VIH – a iste conclusion veniva le recercatores del Parca Darwin de Crocodilos al parte tropic de Australia Nordic explorante le sanguine del reptile. Per iste discoperta pote devenir possibile le disveloppamento de un nove antibiotico. Le systema immun del crocodilo es multo plus forte que illo del homine e illo es multo plus resistente contra le infectiones periculose, contra le vulneres grave. On faceva le prime explorationes del systema immun per crocodilo in 1998 e se verificava que le anticorpore in le corpore del reptile occide le bacterios – annunciava Adam Britton, scientista australian, qui ha narrate que si on adde sero de crocodilo a sanguine infectate per VIH illo face un multo plus grande effecto que le sero human; illo quasi devora le majoritate del viruses VIH.

Ascolta le texto!

Le nomine del village esseva mislegite

In Brasil le policia ha devastate per inadvertentia un plen village per bulldozers. Le septanta policieros debeva destruer un altere village a distantia de octo kilometros secundo un ordine judicial, proque le colonia esseva construite illegalmente.

Ascolta le texto!

Error diplomatic: esque footballistas arabe son terroristas?

Le prime ministro hungare, Ferenc Gyurcsány (pronuncia Ferents Dyurtchany) ha facite un nove error per su bucca: in un incontro de su partito MSZP (PSH – Partito Socialista Hungare) ille ha dicite super le match de football hungare-saudi, que le “footballeros hungare ha jocate contra le terroristas arabe per un bravura non calculante mesmo le morte”.

“Il es multo difficile pro nos glutir iste burla” - diceva le ambassator de Libano in Budapest. Nunc Arabia Saudi ha revocate su ambassator in Budapest pro consultation. (Antea Hungaria habeva multo bon relationes diplomatic con paises arabe.)

Le occasion esseva publicate per un quotidiano hungare conservative, Magyar Nemzet (Madyar Nemzet – Nation Hungare), e illo resultava un grande echo international a causa del publicationes del Reuters e del Agentia de Novas AP.

Antea Gyurcsány ha facite etiam altere “burlas”, pro exemplo quando ille parlava super le thema “que merita le citatanos hungare”. In le vice appareva anque, que illes merita a cambiar lor sposas deveniente sempre plus vetule al sposas plus juvene – naturalmente le organisationes feminista protestava contra isto.

Ferenc Gyurcsány es le secunde prime ministro usque nunc desde le “democratia” post 1990, qui non esseva eligite per citatanos hungare electoral, ma solmente per un stricte gruppo de su partito socialista (circa 200 personas). Isto esseva necessari, proque le eligite prime ministro socialista in 2002, Péter Medgyessy (Meddyeshi) se monstrava inapte a iste rolo in 2004. [Le prime occasion de iste sorta occureva, quando le prime ministro József ANTAL (Yoojef Antal), conservative, eligite in 1990 ha morite in 1993. Alora naturalmente le sequente prime ministro usque 1994, Péter Boros (Peeter Borosh) non esseva un prime ministro eligite.)]

Serbos menacia hungaros in le village hungare Torda in Vojvodina (Serbia)

Se formava un situation multissimemente tense in Torda apud Nagybecskerek (in le serbo Zrenjanin), post quando juvene serbos del village vicin visitava le village mesmo duo vices pro rixar con le hungaros ibi.

Durante le passate sesquialtere septimana transiva 15-20 juvenos serbe ex le village de Udvarnok (Banatski Dvor) a Torda, situante 10 kilometros del village pro luctar con le hungaros de ibi – annunciava a jovedi János Dobai, le vice-presidente in Torda del VMSZ (Vajdasági Magyar Szövetség – Alliantia Hungare de Vojvodina). Ille narrava, que illes esseva principalmente juvene refugiatos serbe de Bosnia, le quales colpava in le discotheca de Torda quatro-cinque juvenes hungare sin ulle causa.

Le prime vice – que occureva ante un sesquialtere septimana – le juvenes de Torda non ha reagite, le policia anque non se occupava con le affaire. Ma in le aurora a sabbato appareva de nove le mesme serbos de Udvarnok (Banatski Dvor) in Torda, e commenciava colpar le hungaros in le discotheca, postea illes ruitava in le centro del village.

Postea 40-50 parentes incirculava le agressores, le quales refugiava al corte del templo, respectivemente del schola. Le policia arrivava post un sesquialtere hora, commenciava protectar le serbos, nonobstante qualques del parentes hungare de Torda batteva totevia le juvene serbos, le quales partiva accompaniate per le policia.

Secundo Dobai se formava un situation extremente tense in Torda, nam le serbos de Udvarnok (Banatski Dvor) ha inviate un message, que in iste fin del septimana arrivara 50 personas in le village pro vindicar se de lor companiones, e le hungaros de Torda commenciava organisar se. Secundo le vice-presindente del VMSZ le chefes de partitos confereva con le representantes del governamento local e con illos del policia pro arrestar un problema plus grande. Le policia promitteva, que illo denuncia le agressores, e invia un ronda de nocte (patrulia) constante in le village.

József Kasza, le presidente del VMSZ admonava, que le hungaros non va tolerar tal actiones usque le eternitate. Secundo ille le policia non debe render lo possibile, que le situation deveni tal, que le minoritates sia constringite a organisar se. A jovedi le representantes del governamento de Vojvodina, Gábor Lódi e Duško Jakovljev anque condemnava le caso occurite. Le Torda de 1800 personas es habitate per hungaros in 90 pro centos, le resto es principalmente romas (tsiganos). Le habitantes de Udvarnok (Banatski Dvor) de 1300 personas es serbos in 60 pro centos, e hungaros in 40 %-os.

Actualisation (augusto 2006): Intertanto il se verificava, que on batte hungaros non solmente in Serbia, ma anque in Romania (ma isto non ha obtenite tanto grande publicitate). Alicun annos retro un mi cognoscita, un puera hungare de Slovachia me narrava, que pueros slovac pulsava un puera ex le traino, quando illes sapeva, que illa es hungara. De plus recentemente era publicate un film in le internet, que monstra, como juvenes slovac face arder un bandiera hungare. E on batte le hungaros anque in Slovachia; recentemente un puera hungare, studente universitari de 23 annos era battite in le urbe Nyitra / Nitra solmente pro que illa parlava in hungaro con alicuno per telephono mobile. Illa debeva ser apportate in hospital. Alicun menses retro touristas de Hungaria era tenite captivate longemente in le policia de Pozsony / Bratislava / Preßburg - le anterior capital de Hungaria historic, ora capital de Slovachia -, proque le guida presentante le monumentos historic del citate era de Hungaria e non de Slovachia e secundo un lege (del resto non plus valide in le tempore del action) in Slovachia solmente citatanos slovac pote exequer tal public guidamento touristic. Al altere latere recentemente in Hungaria, al publico de un match de football appareva subtitulos contra le slovacos.

Se leva le question, esque tal paises como Romania, Serbia e Slovachia son "matur" a ser parte del Union Europee, viste que tal affaires pote occurrer in illos. De plus in Slovachia (e Chechia) le decretos de Beneš es ancora valide in le constitution(es). A saper: illo declara le superioritate slave, e in illo se scribe, que le germanos e le hungaros es culpabile collectivemente pro occurrentias historic e que illos pote ser punite secundo iste derecto anque collectivemente, pro iste ration. Vos ja pote saper: iste decretos olim causava le relocation de germanos de Chechia in amonta, etc.

Le infantes chinese son plus reservate

Secundo un mesuramento, le infantes chinese de tres annos surride plus rarmente que lor contemporaneos american, nonobstante que le solide quietude e surriso del populos oriental es in general multo invidiate in le societates occidental plen de tension.

Del examines ha devenite clar que le familias chinese, le quales educa in le majoritate del casos solmente un infante, ha troppo de pretensiones requirite de lor infantes, e assi le infantes chinese deveni dependente, e multo plus reservate, que lor contemporaneos american.

Ascolta le texto!

Es Irlanda identic con Atlantida...?

Il ha plure theorias re le ancian location geographic del absorbite continente Atlantida, ma nunc se ha annunciate un geographo svedese con un nove: ille opina que Atlantida esseva de facto le presente Irlanda.

Ulf Erlingsson basa su assertion super le descriptiones detaliate de Platon – philosopho ancian grec – del anno 360 ante Christo. Platon scribe que Atlantida ha un grande plana in su medie circumferite con montes, e secundo Erlingsson, del 50 plus grande insulas del mundo solmente Irlanda conveni a iste descriptiones.

De plus, le insula describite per Platon es justo 480 kilometros longe e 320 kilometros large, como Irlanda, e es plus large in le medie que a su duo bordos. Assi describe Erlingsson in su nove libro titulate Atlantis from a Geographer's Perspective: Mapping the Fairy Land.

Ascolta le texto!

Corea del Sud va cambiar de capital

Le governamento de Corea ha resolvite a edificar un nove capital del stato, situate in le centro del pais. Iste projecto comenciara in 2007. Per isto on spera que Seul (le capital grandissime con plus de 10 milliones de habitantes) devenira minus congestionate.

Le nove capital essera construite a 160 kilometros de Seul, in le provincia de Chungcheong, un zona con bon accessos. On spera que le prime ministerios se movera al nove citate in 2012.

Ascolta le texto!

Esque le nomine face uno plus sexy?

Un nomine agradabile pote render alicuno plus sexy - assere le linguista Amy Perfors del Instituto de Technologia de Massachusetts.

Illa ha monstrate photos de feminas e homines al subjectos de un experimento. Le subjectos debeva appreciar le personas in le photos secundo quanto illes les trova sexualmente attractive.

Postea le mesme photos esseva monstrate etiam con prenomines. Il se monstrava que le verdicto del “publico” depende multo del sorta del vocales apparente in le nomines.

Le viros cuje nomines contine vocales formate avante in le bucca - como in le nomine “Matt” - esseva trovate plus sexy, que illes con nomines de vocales formate detra.

Justo le inverso vale al feminas – assere le studio.

Ascolta le texto!

MSN Messenger sin installation

Microsoft prepara un nove version de su successose programma de chat MSN Messenger que permitte mantener un lista de contacto pro vider su amicos actualmente in-linea. On pote contactar personas per illo per scripto e per voce.

Le nove version de Microsoft va offerer iste functionalitates sin le necessitate de installar alcun programma in le computator personal; le navigator del web sufficera. Assi on rende plus facile le uso al personas que non pote connecter se ab lor empleos o scholas.

In Taiwan on va scriber inversemente

Le taiwaneses ha nove defia. Desde ora, secundo un nove lege del governamento, le scriptura de tote le documentos debe esser comenciate del sinistre parte del papiro al dextere, secundo le practica occidental - le qual es justo le inverse maniera, que illo de Taiwan usque nunc. On face iste cambiamento, proque multe parolas anglese es usate in le textos, scribite alicun vices del dextere latere al sinistre. Le governamento intende finir iste situation chaotic per le lege, le qual non concerne documentos historic.

Que vos pensa super iste manifestation del globalisation guidate per le lingua anglese, destruente ancian culturas?

Ascolta le texto!

Esque le methano-emission del Marte prova le vita?

Scientistas del NASA e ESA detegeva un signo probabilemente provante le vita sur Marte. Ambe gruppos discoperiva independentemente le un del altere le presentia del methano in le atmosphera del Marte. Le methano sur le Terra es inter alteres le subproducto del organismos vivente.

Le observation del methano passa jam desde multe tempore pro le „calice sancte” del scientistas investigante le atmosphera del Marte, proque su presentia pote esser le prova univoc del vita extra le Terra. Ni le NASA, ni le ESA annunciava ancora le discoperta officialmente, ma le presentia del methano es ver secundo le expertos cognoscente le datos.

Le nova arrivava septimanas post que le NASA e le ESA annunciava su discopertas concernente le grande quantitates de aqua sur Marte, le quales aliquando poteva reservar le vita. „Sur Marte le methano se annihila pro le intensive radiation ultraviolette, nam su duration del vita es relativemente basse: 300 annos. Si illo anque nunc es presente, alora illo debe esser continuemente generate”, explicava le coordinator del recercas europee Vittorio Formisano, scientista del Institution de Scientias Physical e Inter-planetari de Roma. „Su presentia es essential e multo importante, nam si illo es presente, alora il debe haber anque un fonte.” – ille addeva.

Ascolta le texto!

Benvenite in mi nove blog!

Car lectores!

Benvenite in mi nove blog, lo que es scribite exclusivemente in interlingua, le lingua vermente international, comprensibile pro plus que 500 milliones de homines in le mundo sin studios previe; apprensibile facilemente a causa de su grammatica minimal; le latino moderne; le sol lingua auxiliar construite, lo que non es inventate (per un sol homine), ma standardisate per un gruppo de linguistas professional e seriose secundo processiones linguistic natural e methodos usual in standardisar linguas national litterari, unificate.

Primarimente mi blog continera tote le entratas facite per me in le blog de actualitates Internodio (http://internodio.cjb.net/), e postea plus novas fresc, de plus mi personal pensatas, considerationes e traductiones.

Commentarios es sempre benvenite!

KOVÁCS Péter, i.e. : "Petro Ferrero de Hungaria"

Ascolta le texto!