Figurina de 6500 annos trovate presso Zalaegerszeg

Venere de 6500 annos de etate ha essite trovate durante un excavation archeologic presso le urbe Zalaegerszeg, sud-west de Hungaria le 7 de julio 2020. Presso iste urbe (mi loco de nascentia e de habitation, le capital del contato Zala) de 2017 se construe un tracia pro probar autos automotive (non guidate per chauffeurs, etc.), usante le technologia 5G - un unic interprisa in le Europa Central - e ante de construer toto al fin, como usual, archeologos excava le terreno.

“Al prime vista mesmo io non credeva, que iste figurina conta 6500 annos” – diceva Lívia Simmer, leader del departimento archeologic del museo Göcseji, qui gere le excavationes al tracia de proba. (Ma on sape, que in nostre epocha il ha manieras scientificamente confidibile pro constatar le etate de alicun fossile.)

Durante le excavationes pro le route de proba pro vehiculos auto-guidante in 2018 on trovava tracias de un colonia prehistoric del s. n. cultura de Lengyel (habente le nomine de un village in le contato Tolna), que se data del 5te millennio a. Chr., dunque del epochas del neolithico posterior e le chalcolithico anterior. Inter iste tracias le plus recentemente trovate “Venere de Zalaegerszeg” ha un importantia mundial, proque de ille epocha del cultura de Lengyel usque ora on a pena ha trovate figurinas elaborate artisticamente tal minutiosemente.

Le “Venus de Zalaegerszeg” - como on lo appella es un statuetta elaborate de argilla e functionava como un idolo. Illo consiste de iste duo elementos, trovate separatemente: le prime es le corpore superior de figura conic, habente le grandor de un palma. Le armas sta horizontalmente, le pectores es minutiosemente elaborate. Le colo detra es schizzate, que pote indicar alicun joiel o un vestimento taliate. Le organo genital feminin es indicate per un schizzo triangular. Le capite manca, ma immediatemente presso le corpore superior jaceva le secunde objecto - le culo, elaborate con emphase e le gamba con un planta allargate.

Lo que illo habeva essite trovate non in su plen integritate, ma rumpite prova, que on lo usava pro scopos religiose, in rituales. A saper: si on rumpe un tal statuetta, alora le potentia, le fortia opinate a illo anque dispare. Como prova a isto previemente le archeologos trovava anque ossos de animales e ceramicas rumpite a simile maniera, non distante del loco, ubi illes ha trovate postea “Venere”. Pro isto illes suppone, que iste colonia habeva un loco separate pro rituales religiose.

Bálint Havasi, vice-director del Museo Göcseji in Zalaegerszeg diceva, que le Venus e altere fossiles de iste serie de excavationes va esser presentate in un exposition virtual, que essera interactive e tridimensional e assi mesmo reproducibile pro scholas per imprimitores 3D...

Gratias pro le fontes zaol.hu e zalamedia.hu.

De dominica nos anque ha un tabula de colonia per runas hungare

Le dominica passate il habeva un incontro presso le strata dirigente de Nagykanizsa a Zalaegerszeg, justo ante le urbe. In le quadros de iste occasion un nove tabula indicante le nomine del colonia Zalaegerszeg era inaugurate festivemente. Le nomine del urbe es scribite sur le tabula per runas hungare. Il es un movimento in tote le pais de placiar tal tabulas, sur le quales le nomines del colonias es scribite per le ancian runas hungare.

Io era presente a iste occasion e faceva photos tamben. Ecce un de illos:

In comparation con le tabula runic, que io videva a Keszthely (un urbe in le mesme contato) illo es plus ornamentate. Lo de Keszthely es simplemente con litteras nigre - sur un fundo blanc, naturalmente; e le toto es plus micre. Lo de Zalaegerszeg bellemente presenta le colores national hungare: le rubie per le litteras runic, le blanco per le fundo mesme del tabula e le verde per le quadro del tabula.

Un del oratores diceva, que le scopo es placiar tal tabulas per runas a tote le colonias (urbes? citates?) de Hungaria; e le sequente passo es fixar tabulettas de nomines per runas sur nostre portas de appartamentos, sub le tabulettas per litteras latin. Un altere orator diceva, que il es importante conservar (anque assi) iste nostre ancian valor, hereditage cultural e le representante de nostre sentimento national. Le orator in chef addeva, que le runas es apprensibile pro hungaros intelligente durante alicun septimanas.

Vos sperabilemente memora, que previemente io ja scribeva postages ci, in mi blog super (o in connexion con) le runas hungare. Forsan le prime era de 2006: http://zalaegerszeg.blogspot.com/2006/03/le-alphabeto-runic-hungare.html e le secunde de 2008: http://zalaegerszeg.blogspot.com/2008/09/le-alphabeto-runic-hungare-vive.html . Iste secunde ja era in connexion con le urbe Zalaegerszeg, proque illo monstra un photo de un boteca, super le qual il era un texto scribite per runas. Ma regrettabilemente ille boteca ja cessava de alora (o cambiava profilo; io non sape). Totevia il es gaudiose reportar a vos super iste recente evento e vider t-shirt de juvenes, sur le quales il es imprimite expressiones, parolas o phrases hungare per le scripto runic.

Le nive, le tempesta e su consequentias

Circa le 1 (prime) de decembre in Zalaegerszeg le temperatura era circa 0 (zero) grados e il habeva multe nive (vide le prime photo), que se disgelava totevia in le ultime dies rapidemente.


Alora le temperatura era circa 10 grados C (ma in le Sud de Hungaria on mesurava mesmo +14 grados...!). Ma ora, in le ultime dies del septimana de novo nive era prognosticate e un grande cadita del temperatura (de novo circa 0 grados). Dunque: le temperie es variate ora, in le initio de decembre.

Hodie il faceva nive solmente un poco, ma le vento ha essite multo forte. Ora vos pote vider, que causava le tempesta:

1) Illo damnificava le umbrellas assi, que illos - non plus usabile - debeva esser jectate via, como immunditias inutile:


2) Mesmo tabellas de traffico deveniva damnificate:

Compra de "auro rumpite"

Passante sur le strata un puera dava a me in mano un papiretto de reclamo:

"Compra de auro rumpite".

Qual stupiditate - io pensava -; si io habeva auro, io non lo rumperea...

E io non lo venderea mesmo non-rumpite... :-)

Le prime emission estive de Radio Interlingua in 2010

Ecce, arrivava le prime emission estive de Radio Interlingua pro junio 2010.

Iste vice io continua presentar le interview interessante con Ingvar Stenström, pionero de interlingua desde le 1950s, ora secretario general del Societate Svedese pro Interlingua. Le registration era facite per me in le 11me Incontro Nordic de Interlingua in Linköping, Svedia, in 2008.

Recitante le historia del movimento de interlingua primarimente in le paises nordic Ingvar mentiona nomines de altere linguas auxiliar o refere a lor adherentes, que io pensa, debeva esser un poco explicate pro le ascoltatores laic.

Ultra interlingua, le lingua auxiliar le plus mentionate in iste interview es interlingue, o previemente appellate: occidental.

Mesmo in iste curte portion de dece minutas del interview nostre "Interlingvar" parla super multe themas: proque ille appoia justo interlingua; qui besonia interlingua. Ille parla super le movimento de interlingua in le 50s e postea; super le rationes de que interlingua es successose in paises nordic. Particularmente son mentionate le incontros scandinave / nordic e le importantia de informar super interlingua in le medios de massa. E finalmente io le poneva le question: proque interlingua non es popular a romanophonos?

Anque iste vice le musicas veni de mi ex-collega musico, Csaba Kocsis, qui habita in le mesme urbe como io; de su album Zenei egypercesek (Musicas de un minuta). Le prime pecia que se audi ha le titulo de Mono-Tone, le secunde: G-dúr master.

Le redactor Péter Kovács vos desira un bon passatempore iste vice con Radio Interlingua!

Le libretto de Ingvar Stenström, mentionate in le emission ha le titulo: Occidental-Interlingue: Factos e fato de un lingua international e pote esser ordinate sub le ligamine supra.

Le editor es le Societate Svedese pro Interlingua, 1997. Le libretto ha 40 paginas A5; le numero ISBN es: 91-971940-2-6.

Le description scribe:

"Occidental, autorate per le estoniano Edgar de Wahl, esseva un precursor de interlingua. Ingvar Stenström, mag. fil. in Svedia, ha examinate le historia interessante del lingua e colligite pro le prime vice le factos de su developpamento e diffusion. Ab isto, ille presenta le conclusiones que pote interlingua apprender del fato de Occidental, e como pote interlingua usar iste experientias pro assecurar su diffusion continue."

Le obra es ordinabile anque directemente a Piet Cleij, Kometenlaan 38, 3721 JT Bilthoven, Nederland e costa 6 €.

Le 22nde emission de Radio Interlingua (pro maio 2010) finalmente arrivate

Io, le redactor de Radio Interlingua, veniva al puncto de rediger un del plus longe interviews, que io faceva usque ora. Illo es con Ingvar Stenström, activista svedese de interlingua e durava quasi cinquanta minutas sin redaction! Pro isto io decideva presentar le interview in plure partes. Ecce le prime in le 22nde podcast de Radio Interlingua, facite in Linköping, Svedia in 2008, in le incontro nordic de interlingua.

Iste vice vos potera audir experimentos musical de un mi collega-musico de mi urbe Zalaegerszeg: Csaba Kocsis. Ille ha facite parve compositiones durante solo un minuta o al maximo duo. Le titulo del prime pecia es: D-moll laza (i. e.: Legier in D-minor), del secunde: Latin.



Bon divertimento!

Le triste realitate hungare

Io sole ir a haber le lunch in le urbe, non in casa durante le "dies de labor". Io mangia alora in restaurantes differente. Hodie io iva a in un, in le qual io habeva essite ja ante longe.

Quando io occupava mi loco, tosto veniva un oncle vetule e se sedeva al tabula vicin. Ille recipeva suppa del servitor, qui demandava de ille, que ille volerea post le suppa.

"Nihil!" - respondeva le vetulo. "Solmente post quando io recipera mi pension!"

Audiente isto le servitor - le proprietario del restaurante - le offereva un sauce vegetabile, que ille acceptava...

Interlingua e musica

A saper: nos interlinguistas ha cantarios, que contine multe cantos traducite in interlingua. Nos canta iste cantos in le conferentias international o in le incontros regional, quando nos nos assembla. Ma usque ora nulle canto hungare se trova in iste cantarios.

Pro compensar isto previemente io habeva un tentativa de traducer un canto a in interlingua, ma illo non succedeva.

Ma ora ecce mi secunde essayo, que es un canto folkloric hungare de mi contato Zala (clicca sur le imagine pro leger le notas music, le accordos e le textos e pro vider le remarcas tamben):


Illo es un canto folkloric del categoria "accopulante", que servi pro accopular duo juvenes (un puero e un puera) melio, recitante bon desiros, etc. in le cantos. Assi on pote reimplaciar le nomine masculin Zoli (nomine diminutive pro Zoltán) e lo feminin (diminutive) Ilush con nomines de alteres qui on vole "accopular" (facer les esser un par in amor o invocar plus de amor, fertilitate, etc. pro illes)...

Ecce le duo verses anque ci:

Tcherta es large,
su ripa - alte.
Nulle garson lo
transnatar pote!

//: Zoli lo transnata,
mesmo vice-versa
ecce, que brave! ://

Sue mantello
es al cavallo,
sue capite
presso amante!

//: Ilush, su amata
tela illa le da,
*multo rubie. ://
*...ornamentate! //
*...multo costose! //

Cserta (pronuncia lo como illo es scribite ci: Tcherta) es un fluvio in mi contato. Ma on pote liberemente substituer lo per le nomine de alicun altere riviera - de duo syllabas... - que se concerne al loco del habitation del duo juvenes que on vole accopular.

Le harmonisation del canto es facite per Miklós Óvári, musico del gruppo Hétrét de mi urbe Zalaegerszeg, que presenta iste canto al maniera de "world music" ("free folk").

Le litteras majuscule significa accordos dur, los minuscule - accordos molle.

Le accordos post le signo " / " se sona in le secunde (i. e.: le ultime) repetition del secunde strophe (dunque: al fin del canto).

On debe repeter in le secunde strophe duo vices, proque le texto del ultime tacto varia. Primo on canta: "multo rubie", al prime repetition "ornamentate" e al fin - al secunde repetition - "multo costose".

Il ha essite un spero, que le gruppo Hétrét canta iste canto "live" in interlingua in su concerto hodie, le 13 (dece-tres) de januario 2010 (duo milles dece) ci, in le urbe, proque le leader del gruppo ha vidite mi traduction in le libro de hospites del sito web del gruppo e illo le ha placite. (Dunque non io habeva le idea de cantar lo in interlingua, ma ille...!) Assi il esserea emphasate le characteristica de "world music" del gruppo - ille dice. (Illes canta cantos folkloric in multe linguas.) Ma illes debeva preparar se in altere cargas musical pro le concerto, que faceva impossibile, que illes se prepara in iste canto. Ma le gerente del gruppo promitteva le dato del 13 (dece-tres) de martio 2010 pro presentar iste canto durante ille concerto. Si isto se realisara, io spera, que nos habera un bon registration sonic de illo, assi que io pote presentar isto in Radio Interlingua...

Il es un altere spero, que iste canto, como le sol canto hungare va apparer in le sequente Cantario de interlingua.

Hungaria Grande vive - al minus in le mente del locales...

Lo que Herta Müller era eligite como premiato Nobel in litteratura iste anno me recorda un caso recente de nos in Germania.

Un gruppo musical folkloristic de mi urbe, in le qual io sona visitava le mercato agricultural del ambiente Kusel (Rhenania-Palatinato, Germania), le qual urbe es partenario de mi urbe Zalaegerszeg. Nos musicava la sub le aere libere e multe passantes nos audiva. Un dama prendeva le contacto con nos, dicente, que illa veni de Temeswar / Temeschwar / Temeschburg (pro mentionar le versiones german del citate Temesvár in hungaro, in rumano Timişoara), que es in le region Banat de Romania, un region al frontiera actual hungaro-ruman. Naturalmente olim Temesvár pertineva a Hungaria.

Illa recognosceva musica simile a lo de su patria e demandava, unde nos veni. Nos diceva: de Hungaria, durante que nos sonava musica de Transsilvania, que poteva sonar a illa familiar. Transsilvania es un "region" vicin a "Banat", ma non es identic con illo, ben que ambes pertineva olim a Hungaria e ambes pertine ora al stato de Romania; pro isto multe hungaros non-informate crede, que anque le ambiente de Temesvár / Arad / Nagyvárad (Oradea in rumano) pertine a Transsilvania. Illa anque rejecteva isto, dicente: "No, io non es de Transsilvania, io es de Banat!" e semblamente illa era multo fer a lo que nos sona un musica vicin a su region de origine. Mesmo illa nos demandava sonar qualcosa de Banat, ma le musica hungare non differe characteristicamente del regiones vicin hungare a Banat e nos non cognosce musica german (suabe) de Banat.

Intertanto arrivava su amicos, le quales illa informava fermente, que "iste
musicos veni de mi patria"... "Ups" - como le germanos dice; illa diceva "de mi patria", malgrado que illa sape, que Banat ora pertine a Romania e non plus a Hungaria, unde nos musicos veniva. Ecce, Hungaria Grande ancora vive - o al minus su memoria in le maniera de pensamento del locales!

Illa es un suaba - un germana - de Banat; multe germanos de ibi cambiava domicilio a Germania ante, durante e in le major parte post le liberation de Romania del dictatura de Ceauşescu. Un tal germana es tamben Herta Müller, qui mesmo parla o parlava in hungaro, veniente de un region ubi hungaros, germanos e rumanos vive o viveva insimul. Un altere famose germano nascite in Banat es le actor de Tarzan, Johnny Weissmuller, nascite como Johann Peter Weißmüller, tamben in Temesvár.

"Bon appetito, senior!"

In alicun die recente, como usualmente in dies de labor (si, quando alteres labora...) io iva a un del restaurantes le quales io sole visitar a meridies. Al tabula proxime - io habeva plen panorama a illo - sedeva un tsigano juvene (si, pro esser politicamente correcte: ille es tsigano...) qui io cognosce de vista (del urbe, del autobus; dunque nos non ha parlate le un con le altere, io non le cognosce personalmente) e su companion (in amor ille es traditionalista, io crede, pro isto su companion es feminin :-) ), amica amate, su amor o como a exprimer isto in interlingua... (Del resto illa non es tsigana, ma hungara.) Ante illes era grande portiones e plattos de repastos, forsan illes ha recipite plus de pecunia que usualmente e assi illes voleva facer un "festa" o qualcosa simile a isto, io non sape. Illes mangiava e conversava intertanto e aliquando appareva un altere tsigano juvene e comenciava a mangiar le contento de un platto essente sol usque alora presso le hungara juvene. Probabilemente ille ha continuate a mangiar lo (un platto de gyros, del resto), que ille sembla haber interrumpite anteriormente. Dunque probabilemente ille iva via del restaurante anteriormente e alora retornava, que non es troppo decente secundo le normas de nos, non-tsiganos, saltar del tabula de mangiar e interrumper le mangiar e postea re-saltar al tabula e continuar. Ma ille faceva isto. Anteriormente io era surprendite e non poteva imaginar, que le juvene tsigano e su amica de amor poterea mangiar tante repastos in duo, ma vidente, que il es ancora un tertie persona, io ja poteva creder isto plus. Ille, le altere tsigano arrivante plus tarde se sedeva al tabula e comenciava o continuava mangiar e post alicun tempore vidente, que io les reguarda - io non poteva evitar le contacto ocular con illes, a causa del position de nostre tabulas - ille reguardava a me e a causa que le tsiganos es forsan generalmente homines immediate e communicative, illes pote adressar uno mesmo si illes non uno cognosce personalmente; ille me diceva per voce alte:

"Bon appetito, senior!"

Assi, in interlingua!

Io era multo surprendite e post alicun secundas de suprisa io replicava con le mesme phrase in interlingua, semi-ridente "Bon appetito!" Io non voleva dicer altere phrase, p. ex. "A vos tamben!" o "Gratias!", proque io non poteva creder, que ille lo ha dicite vermente in interlingua e io non voleva involver me in un discussion plus longe con illes (ma comportar me naturalmente).

Post mi responsa percipite, que io non vole dicer plus ille ha retornate a concentrar se a mangiar e per isto nostre "conversation" era finite. Postea ille mangiava e parlava de bucca plen con le repasto (io poteva de facto vider le salata del gyros in su bucca...), que es anque indecente a nos, hungaros (non tsigan). Ille ha parlate al maniera tsigan, dunque per alte voce e conversate con su amico o fratre (le "prime" tsigano) e in hungaro e in tsigano (que es un rumper de politessa verso le puera qui es un hungara) e post un tal conversation in tsigano ille quasi saltava del tabula e lassava le restaurante e su lunch de novo. Le alteres era tranquille e mangiava plus, forsan illes sapeva o supponeva, que ille va retornar postea. Intertanto io ha finite mi lunch, pagava e lassava le restaurante.

Io meditava, forsan ille ha parlate a me vermente in interlingua? Io audiva clarmente iste formas del parolas: bon (e non buon, como in italiano) appetito (e non apetido, como in espaniol) e senior (e non se~nor, como in espaniol o signore, como in italiano). Al qual io audiva isto esser in interlingua io ha duo explicationes:

1) Isto vermente era in interlingua e isto poteva esser causate per que

a/1) ille ha sentite subconsciemente que io cognosce interlingua (alicun tsiganos pote - ancora? - haber tal "sensationes sexte", subconscie, etc. essente un population plus proxime al natura o maniera de viver natural o hereditate geneticamente del ancestres) e assi ille me automaticamente adressava in le lingua que le prediceva le instinctos o alicun "suggestion spiritual", etc.

a/2) Ille non intendeva isto a esser interlingua e ille non sape le italiano o le espaniol correctemente e isto "per hasardo" deveniva totevia interlingua, proque le formas de parolas que ille "creava", "per hasardo" - causate per su "sexte sensation", etc. - coincideva con le formas de interlingua.

b) ille me videva in le television o in le jornal local parlante super interlingua e se informava del lingua o sape de alicun altere fonte, que io es un usator-parlator-adherente de interlingua e ille lo apprendeva (un poco) e habente me recognoscite secundo le programma televisive o le photo in le jornal al articulo super me ille me adressava per intention in interlingua

2) Isto non era interlingua, ma io ha misaudite le expression espaniol

"!Bon apetido, se~nor!" como

"Bon appetito, senior"

a causa del circumstantias auditive (ma il habeva poc de ruito...) o altere cosa; p. ex. proque io ja tamben subconsciemente, automaticamente ignora le differentias in le casos quando io ascolta alicuno parlar in alicun "dialecto" de interlingua (espaniol, italiano, etc.) e me concentrante al essential de lo que ille/illa vole exprimer p. ex. io ignora in mi mente le desinentias grammatic de parolas determinate per le genos - que non existe in interlingua a adjectivos, etc.- e io crede , io memora haber lo audite in interlingua.

Secundo vos qual puncto es le plus probabile? :-)

Post iste experientia io ha subito convocate un conferentia scripte in Skype inter mi amicos interlinguista alora essente in-linea pro divider iste historia con illes e demandar lor opiniones, etc.

Il es anque interessante, proque ille me voleva adressar in un lingua intendite romanic (si isto non era intendite esser interlingua): esque forsan ille credeva, que io es un tourista de alicun pais romanophone? Claudio Marcon, romanichista italian me scribeva, que io es del typo genetic centro-europee, que pote esser un hungaro o un sloveno, o un italiano nordic... Forsan ille tsigano credeva, que io es un italiano nordic...?

Szovtetunió?

Heri il habeva in Hungaria le die festive de memorar le revolution in 1956 e io participava le festa de memoria in mi urbe.

In le parte ubi scholares legeva fragmentos de obras litterari, un pueretta de forsan al maximo 12 annos non sempre poteva pronunciar adequatemente le parola Szovjetunió. GRATIAS A DEO!

Iste situation non multe annos (duo decennios) retro era inimaginabile in Hungaria, que un scholar non pote pronunciar lo adequatemente... Gratias a Deo, que hodie illa debe solmente apprender PRONUNCIAR le parola justo, e non EXPERIENTIAR le Union Sovietic mesme...

Le alphabeto runic hungare vive!

Mi lectores fidel forsan ancora memora, que in connexion del alphatebo runic de nordicos io scribeva articulos hic super le original alphabeto de hungaros, como isto:

http://zalaegerszeg.blogspot.com/2006/03/le-alphabeto-runic-hungare.html

Desde alora io discoperiva, que un boteca in Zalaegerszeg applica iste alphabeto, dunque lo usa in practica, assi iste alphabeto vermente vive in function!

E pois que io ha comprate un apparato de photographar, ora io ja poteva photographar le fronte del boteca:


Il es interessante vider le hereditage latin in Hungaria (in le nomine del boteca) e le coexistentia del traditiones ancian hungare, in le scripto per runas.

Le texto se lege como "kincses bolt" - per le alphabeto latin del hungaro - e significa: "boteca con tresores".

Radio Interlingua in internet!

Car amicos!

Con grande gaudio io vos informa, que Radio Interlingua (de novo) "emitte" in internet!

Post le initiativa de Simona e Florin Sunel in 1997, le Radio Interlingua renovate in 2008 ha su prime emission preste e accessibile pro totos. Su loco primari es a http://www.interlingua.com/radio , ma vos pote ascoltar le prime emission, que io ha redigite tamben de hic:

Get this widget | Track details | eSnips Social DNA

Del contento: | Presentation de Radio Interlingua | Que es interlingua? | Actualitates de interlingua: 11me incontro nordic de interlingua, Linköping, Svedia | Interview in interlingua: Péter Kovács parla con Bengt Enqvist, vice-presidente del Societate Svedese pro Interlingua, durante le incontro nordic de interlingua.

Intertanto vos pote audir musica popular ruman, al honor del copula Şunel de Romania, qui ha initiate le radio in 1997.

Le plus importante characteristica de Radio Interlingua es, que illo parla in le lingua auxiliar interlingua de IALA (pro plus de detalios super le characteristicas lege plus in le pagina http://www.interlingua.com/radio ).

Vos es multo benvenite scriber vostre propositiones, opiniones, criticas, observationes, ideas, etc. in forma de commentarios, o emails del pagina http://www.interlingua.com/radio/participa , respectivemente del paginas aparte del emissiones, como illo del prime: http://www.interlingua.com/node/527 . Ma viste que le lista de tote le emissiones appare in le pagina principal http://www.interlingua.com/radio , on pote commentar le emissiones aparte tamben de iste pagina.

Quicunque pote contribuer vocalmente al emissiones (pro exemplo legente textos in interlingua o parlante liberemente...), vide hic, como: http://www.interlingua.com/radio/participa ; le procession es multo simple, quicunque es capace a facer registrationes vocal per computator! Si totevia illo se prova difficile pro te, consulta le redaction per le adresse e-postal radio@interlingua.com e forsan nos va trovar un altere solution p. ex. pro esser interviewate per me... :-)

Io, Péter Kovács es le sol redactor usque ora, ma io multo me gauderea, si io habeva co-redactores persistente o occasional con contributiones vocal in qualcunque thema - le sol condition es, que on parla in interlingua de IALA, grammatica- e linguisticamente correctemente, con le pronunciation e accentos normative.

Io vole regratiar a Thomas Breinstrup e Alberto Mardegan que illes dedicava lor tempores pro le labor technic de publicar Radio Interlingua in le sito de UMI www.interlingua.com.

Nove parola a apprender in interlingua: parabrisa...

Un die recente io voleva ir a vacantias a Balaton, a nostre bungalow per auto. E io ha pensate, antea io face le auto lavar in un station de gasolina (non per proprie manos, ma automaticamente). Io iva pro replenar de combustibile al station de gasolina, a ubi io sole ir. Ma illac le lavator automatic non functionava, dunque io iva al station le plus proxime.

In le altere loco toto semblava esser in ordine, usque le puncto verso le fin del procession de lavar, quando io audiva sono de rumper: alora io videva, que le seccator que approximava le parabrisa anterior de mi auto jaceva sur illo, non habente sentite le position del parabrisa illo collideva con illo. E le schermo del lavator scribeva, que il ha alicun problema e on debe consultar le personal. E isto occurreva justo in le ultime phase del lavamento...

Alora le empleata vidente que occurreva, suspirava automaticamente, que illa es fatigate de iste casos. Alora io tosto comprendeva, que non isto es le prime caso... Durante plenar un formulario de annunciar le damno verso le compania de assecurantia, io refereva plure vices a iste su phrase, que non isto era le prime caso de iste sorta. Ma illa non reageva, solmente al fin illa confessava, que previemente il habeva un tal caso e le typo del auto era justo le mesme, como illo de mi auto (Lada "cubic")... Interessante, nonne? E intertanto, ante iste responsa de illa io ja explorava le parabrisas del autos moderne (in le station de gasolina totes era moderne, excepte le mie...) e a tote de illos le parabrisas era plus concave, que le mie. Le arco de illos non era tanto pron, que le mie. Assi io concludeva, que forsan iste seccator del lavator automatic era elaborate pro parabrisas de autos moderne e pro isto illo non sentiva le arco del parabrisa plus concave de mi auto vetuste.

Post plenar le formulario io iva a casa e photographava le auto in iste su stato in casa in le parking,


al caso futur, esque le compania de assecurantia besonia un photo (si on aggrandi le photo, on pote vider le damnos melio:


... e le empleata del station de gasolina tamben lo photographava previemente), proque io voleva facer le parabrisa cambiar immediatemente (ben que io videva adequatemente trans le parabrisa durante conducer, io non voleva riscar que alicun fragmento me damnifica durante conducer) e io non habeva tempore pro consultar le compania de assecurantia, proque io voleva viagiar al bungalow a Balaton pro vacantias ancora in ille die, como io lo planava e non remaner in casa ancora duo o plus dies pro isto. Pro isto io cercava un officina de reparation ja in ille die, a fin que io non perde troppo de tempore. Le tempore urgeva, proque le officina de reparation claudeva a 5 horas p. m. [postmeridie] e quando io poteva ir a illo, il era ja 3 horas e plus que un medie p. m. Ma le reparatores faceva le labor ante de ir a casa, proque previemente io telephonava al officina pro demandar e organisar toto. On habeva justo un exemplar in stock al typo de mi auto...que fortuna, nonne?

Le reparatores laborava vermente rapidemente, io non debeva attender multe e illes prendeva congedo del chef justo post haber le labor finite (circa 4 horas p. m., benque le officina claude a 5 horas p. m. ...). Con le chef io concordava, si le compania de assecurantia besonia le photo, illo pote consultar le officina.

Io poteva ir al bungalow in ille die, toto era in ordine. Post haber retornate a casa, in alicun die recente arrivava le homine del compania de assecurantia. Quando ille telephonava anteriormente, post quando io le ha explicate le evento ille demandava: "...e ubi es le parabrisa avariate?" "In le officina, como le photo" - io supponeva e diceva isto a ille.

Durante plenar le papiros, etc. ille diceva, que non io o le officina de reparation haberea debite photographar le auto in ille su stato, ma ille (como representante del compania de assecurantia) e que io non haberea potite facer le parabrisa reparar durante cinque dies, secundo le lege...alora forsan io non recipe le costos del reparation del compania de assecurantia, io me (e le) demandava. Ille respondeva, non ille va decider in isto, ma un organisation in Budapest.

-

Actualisation: recentemente le postero sonava a nostre porta e dava moneta: justo le summa del nove parabrisa. Io videva, que le inviante era un compania de assecurantia, dunque il me deveniva evidente, que le assecurantia pagava mi damno. Ma nulle explication sur papiro arrivava, solmente le summa... Isto es lo importante, nonne? Totevia secundo me io haberea debite reciper un explication official in lettera, nonne?

Statuas in “discussion” - 3. Albert Wass, le poeta e scriptor nobile

Viveva un homine, conte Albert Wass de Szentegyed e Czege, un nobile hungare de Transsilvania de 1908 usque a 1998. Quando ille nasceva e era un infante, Transsilvania pertineva ancora a Hungaria e ille experientiava tragicamente tote le occurrentias historic in connexion de annexar lo a Romania secundo le tractato de pace in le palatio Petit Trianon de Versailles in 1920 (realisate in 1921) post le prime guerra mundial. Ille experientiava tamben le evenimento de re-annexar Transsilvania de Nord a Hungaria secundo le decision secunde de Vienna in 1940. Ma postea Hungaria perdeva le secunde guerra mundial e non volente vider le re-occupation ruman de Transsilvania de Nord ille seligeva emigrar al West de Europa in 1945. Durante su absentia in 1946 le tribunal popular ruman le condemnava a morte a causa de “crimines de guerra e homicidio”. A causa de isto – le verdicto es valide mesmo hodie, malgrado que ille provava su innocentia e ille se prova innocente – ille non poteva jammais re-visitar su patria, Transsilvania durante su vita. Le stato ruman post 1945, inclusive le regime communista del “conducator” (dictator) Ceauşescu le persequeva e essayava committer assassination contra ille plure vices in estraniero, ubi ille viveva, ma le agentias secrete de ille statos sempre poteva impedir istos. Primo ille viveva in Germania, postea in America. Finalmente ille moriva in Florida, SUA in 1998, sub circumstantias non solvite usque hodie – verisimilemente ille committeva suicidio, viste que in addition a lo que ille non poteva retornar a Transilvania (Romania) a causa del verdicto mortal, ille anque non re-recipeva le citatanitate hungare del stato hungare pro sempre, ma solmente pro un anno – e ille non poteva acceptar isto. Postea su restos ha essite apportate a casa a in Transsilvania.

Ille era un poeta e un scriptor, un character symbolic de exprimer le dolor hungare e le sorte transsilvanian o pan-hungare in relation de perder Transsilvania. Pro isto ille recentemente ha devenite multo popular e amate in circulos patriotic e dextere (conservative) hungare e in plure colonias hungare on vole(va) establir statuas a su honor. Istos poteva realisar se in colonias sub conservative direction politic, ma non poteva realisar se in los sub directiones sinistre e liberal (e ille non pote haber ulle statua in Transsilvania, proque le verdicto mortal es ancora valide in Romania contra ille).

Un statua public de ille se realisava tamben in Zalaegerszeg, mi urbe (sub direction politic dextere) organisate per le governamento urban e io, como musico participava in le inauguration festive. Il habeva multe spectatores e ultra le actores local il era tamben rolantes de Transsilvania, gruppos de dansas folkloric del ambiente de Marosvásárhely (Târgu Mureş, citate in Transsilvania, colonia partenari de Zalaegerszeg). Mesme le creator del statua es un sculptor de Marosvásárhely / Târgu Mureş, qui donava le statua al urbe Zalaegerszeg e ille era multo toccate, quasi comenciava plorar, quando on mentionava su nomine durante le oration. Ecce su creation vermente admirabile:

Ora vos vide mi photo posterior del loco, ubi on recitava versos, dansava, cantava e musicava (inclusive me) durante le inauguration del statua. Ora illo es quiete.

Como vos vide, le statua es in bon condition, illo es nove, etc.:

Post le festa in un programma de radio interretiari io habeva audite qualcosa, que me pareva referer a lo, que le statua de WASS Albert in Zalaegerszeg forsan ha essite dishonorate per culpabiles incognoscite. Ma io non era certe in le information e io non poteva creder isto; io credeva, que forsan io lo miscomprendeva. E mi photos facite super le statua postea confirmava isto in me; ubi appare nulle tracias de un dishonoramento:

Ma preparante me a iste articulo io cercava informationes in le internet e trovava un articulo del 23 (vinti tres) de maio, secundo le qual autores incognite ha pingite le sculptura de Albert Wass inaugurate a pena ante un septimana in Zalaegerszeg. On ha “supplementate” le inscriptiones sur le construction detra le statua per parolas (o expressiones) vituperative, abusive. Alora io observava mi photos alora ja preste, esque il ha ulle signo de injuria, ma io non ha trovate qualcosa referente se a isto. Il me pare, si il habeva injurias del toto, on succedeva facer los disparer multo effectivemente. Inter le inscription del nomine e le inscription del annos appare nulle altere “inscription posterior” pingite a ibi per spray, como il es usual (vide mi previe duo articulos in iste thema). Assi le memoria de Albert Wass pote viver in plus imperturbate.

Statuas in “discussion” - 2. Le monumento pro... que exactemente?

Si io seque le occurrentias politic del tempore recente in Zalaegerszeg chronologicamente in relation con sculpturas, le sequente debe esser a mi aviso illo circa le monumento de “liberation”.

In le vocabulario del communismo le “liberation” significa le invasion per le truppas sovietic post le secunde guerra mundial in 1945 (mille novem centos quaranta cinque), que forsan significava un liberation del nazismo in Hungaria, ma al mesme tempore un altere conquesta que resultava un altere dictatura in Hungaria de 1945 usque a 1989 / 90 (octanta novem / novanta).

Le monumento era sculpite per MIKUS Sándor in 1955 (cinquanta cinque) e facite per revolutionarios anticommunista cader in 1956 (cinquanta sex; durante le revolution e lucta pro independentia in Hungaria ille anno). Un mi oncle qui era presente alora al evento mesmo sape le nomine del persona, qui conduceva le camionetta al qual era fixate cordas pro assi facer le monumento cader. Su fratre (un mi altere oncle) debeva emigrar del pais verisimilemente justo proque le communistas le accusava de participar in iste evento. Post le “retorno” del communismo a in le pais le monumento era restablite e illo sta a su loco original mesmo usque hodie, malgrado que intertanto – on assere – nos ha cambiate al democratia depost 1989 / 90.

Vide iste photo (non proprie!) super le monumento in le stato como illo stava firmemente, sin cambio durante decennios in Zalaegerszeg:

Il es incomprensibile, proque illo sta ancora sur ille loco post le cambio in 1989 / 90 / 91 (novanta un; quando le ultime soldato sovietic quitava le pais) si tote le democrates hodierne reguarda le revolutionarios de 1956 como lor ancestres ideologic e iste revolutionarios in 1956 faceva le monumento cader... Proque illes hodierne non vole remover lo (solmente le radicales dextere)...?

In le articulo de Zalai Hírlap (le sol quotidiano local univocamente partial in favor del ideologia e le partito sinistre) appareva un curte referentia al occurrentia recente (detalios postea infra) con un photo super le sculptura con un commentario que le monumento establite originalmente al memoria del “liberation” ab le nazismo livrate per le truppas sovietic es considerate hodie, post le cambio al “democratia” como un monumento pro memorar le exodo del truppas sovietic (in 1991) post le cambio politic. Ma isto es multo verisimilemente un mentita, un mendacio, un semi-veritate inventate per le jornal a fin de manipular le gentes verso le latere politic sinistre! Ben que sur illo il es scribite le numeros 1945 e 1991 a fin de autorisar, explicar in alicun maniera le existentia del monumento justo in su loco original (mesmo multo central, ante le station ferroviari), io e mi circulo non del toto sape super ulle cambio in reguardar iste monumento “non plus” referente se al “liberation” = conquesta sovietic in 1945, ma justo al exodo sovietic in 1991...! Mi sequente photos va demonstrar, que le gentes reguarda iste sculptura in su significato original in connexion de 1945:

(Ante toto io vole evocar vostre attention al casas al duo lateres del monumento: in Zalaegerszeg on rarmente vide tal typic casas archaic que olim – ante le apparentia exaggerate del stilo socialista-realistic in le architectura local e del edificios alte de plure etages – characterisava tote le urbe.)

Compara mi photographia con le previe que tu vide supra: il ha duo differentias plus importante: le monumento ha essite versate per tinta rubie – le symbolo del communismo, ma forsan hic intendite como symbolo de sanguine, un referentia al vengiantia communista...? -, in plus il es scribite qualcosa per spray de tinta.

Le inscription original infra es: “felszabadulásunk emlékére”, i. e.: “al memoria de nostre liberation”, ma le parola “felszabadulásunk” i. e. “nostre liberation” es superscribite per spray con le parola “'megszállásunk”, i. e. “nostre conquesta”. Assi le texto “modificate” se comprende: “al memoria de conquirer nos”.

Si on vade plus proxime, on pote discoperir altere inscriptiones per spray de tinta rubie, ma io non poteva identificar le parolas:

Esque le governamento urban (del latere dextere ja alora) vermente pensava, que il non es necessari remover le monumento post le cambio del systema politic, ma solmente tractar lo in plus como un monumento al memoria de exodo del armea sovietic in 1991...? Le slogan se cambiava, ma le edificio remaneva le mesme, create in 1955 ma removite in 1956, restablite in 1957... Semblamente le gentes non oblida isto e non da un autorisation a lo que le monumento remane ibi e lo tracta anque in plus como un monumento al memoria de conquirer Hungaria per le sovieticos; un symbolo del dictatura communista.

Le burgomaestro (politicamente del latere “dextere”, ma non sempre radical) non ha un situation invidiabile:

• si ille faceva remover le tinta rubie, radicales de dextere le accusarea con facer un gesto verso le latere sinistre (socialista o socialdemocratic);

• si ille non faceva le tinta remover, alora ille poterea esser attaccate per le socialistas per lo que “ille consenti con le action extremista”;

• si ille faceva remover le monumento mesme, isto esserea “troppo extreme” pro le socialistas e mesmo pro le conservativos “plus molle”.

• Si ille faceva remover le construction e establir un altere in vice de illo, isto esserea anque “troppo extreme” pro le latere del sinistra, ma esserea acceptate per le conservativos e mesmo per le radicales del dextera.

Ma io pensa, ille e su circulo facera nihil (face e faceva nil post quando le tinta appareva sur le construction). Per iste inactivitate le governamento local vole plus tosto supprimer le affaire, facer le gentes oblidar iste affaire, non facer les occupar se con isto a fin que le burgomaestro e le governamento non se confronta con ulle latere politic. Ma assi ille remane confrontate solmente per le latere dextere radical (ma isto sembla non interessar le...), ben que per lo que ille non face le color rubie remover face uno pensar, que ille e le governamento exprime celatemente su consentimento con le action “de pictura”.

Assi secundo me le monumento remanera ancora longemente in su loco in su stato hodierne non cambiate assi, per le inscriptiones posterior, facite per alicun “artista nocturne”...

Statuas in “discussion” - 1. Hồ Chí Minh, le leader vietnamese...

Forsan inspirate per le serie de Erik Enfors in su blog (Alcun sculpturas public in Varberg), io anque presenta un poco le statuas public de Zalaegerszeg, registrate per mi proprie camera photographic. Mesmo io comencia con statuas discutite, que ha actualitate politic recentemente.

Anno 1976 (mille novem centos septanta sex). Dato: le 30 (trenta) de april. In Hungaria il es socialismo (communismo), dunque: un systema politic dictatorial. In Zalaegerszeg on inaugura le statua de Hồ Chí Minh. Io non meditava re isto alora, io habeva un anno... :-) Ma nihil occurre con le statua durante le decennios, nihil mesmo post le cambio del systema politic in 1989 / 90.

32 (trenta tres) annos postea totevia occurre qualcosa: verisimilemente le 28 (vinti-octo) de martio 2008 (duo milles octo) le presidente local del partito Jobbik Magyarországért Mozgalom (Movimento pro un Hungaria Melior) ha coperite le statua de Hồ Chí Minh (vide supra) in Zalaegerszeg per un folio nigre. (Io ha vidite le statua alora con le folio nigre del fenestra de un bus local que ha su route ibi.) Le partito radical de dextere ja ha initiate le remotion del statua in 2005, ma semblamente le governamento del urbe (ben que guidate per un burgomaestro dextere) ageva nihil in iste respecto. Postea Jobbik dirigeva un question al governamento, ma nulle responsa arrivava.

Proque habe un representante del dictatura sanguinari communista un statua in un loco public de un urbe in Hungaria, ubi – on assere – le dictatura communista ja ha passate e il ha – on assere - “democratia”? Isto es vermente incomprensibile non solmente pro le Jobbik. On scribe, le dictatura communista in Vietnam requireva un million de victimas e Hồ Chí Minh es un persona vermente discutite mesmo in Vietnam. Il ha nulle obligation de haber statuas public de tal homines in Hungaria, in mi urbe. Il es ver, le statua de Lenin era removite in Zalaegerszeg post le cambio del systema politic in Hungaria, ma non illo de “oncle Hồ”. Vos pote vider al photo sequente, que es ora in le loco del statua de Lenin de olim, que io memora ancora de mi infantia. Illo era un vermente bon labor artisticamente, un multo grande statua... ma philosophicamente, politicamente naturalmente illo non plus poteva haber loco ibi. Io non ha trovate ulle photo vetule del 80s o plus previemente in internet super le statua de Lenin in Zalaegerszeg e io non sape, ubi le statua se trova ora – si illo ancora existe. (Secundo un sol information in le internet illo se trova in le parco de sculpturas in Budatétény – Budapest, ma io non poteva verificar iste sol information.)

Isto non es le optime photo mie, ma quando io faceva un tour per mi bicycletta intra le urbe pro facer photos a vos, sur le route ab le statua de Albert Wass verso le statua de Hồ Chí Minh se trovava iste loco, le statua “Ex-Lenin” como io lo appella (lo que es sur le loco del statua Lenin de olim) e io decideva facer un photo rapidemente anque re illo... Forsan a iste photo redigite on vide plus:

Ma retornante a Hồ Chí Minh: brevemente post iste action del Jobbik le folio nigre era removite. Esque officialmente per le governamento local...? Esque inofficialmente, secretemente per individuos communista o “communista-phile” o sinistre-liberal p. ex. durante le nocte...? O per representantes de partitos "minus radical" e/o sinistre-liberal durante le die, officialmente o al minus publicamente? O mesmo: secretemente o publicamente per esperantistas revolutionari, viste que Hồ Chí Minh parlava e appoiava anque esperanto...? Io non sape. Ma le capite del statua Hồ Chí Minh ora de novo se vide assi, como vos lo vide sur mi sequente photo e le Jobbik usque ora non lo ha recoperite per folio nigre:

Ma intertanto ha apparite un inscription sur le fundo detra le statua (io non crede, que illo era pingite a ibi per le Jobbik durante su action official de coperir le statua per folio; io crede, le inscription veniva plus tarde al monumento). Vamos ir plus proxime, a fin que nos vide, que es scribite per spray de pictura al fundo ubi se vide le populo de “patre Hồ”, assi facente theoreticamente un bon effecto tridimensional:

Que? Vos non pote leger lo mesmo de iste puncto de vista? Alora io vos monstra le inscription de un altere puncto de vista, ubi le statua non lo coperi. Ecce:

Que vos dice ora? Le-bon-ta-ni? Vos pote leger le parola, ma vos non lo comprende? Ah, vos non es hungarophonos...:-P Alora io lo traduce a vos. “Lebontani” significa “demolir lo” - intendite in imperativo. Qui ha pingite isto al fundo detra le statua? Io non sape, probabilemente alicuno secretemente. Vos pote vider, que le parte superior de iste parte del monumento es plus nigre, que le inferior. Isto es proque previemente le mesme inscription se videva plus superiormente (io videva isto alora) e on poteva facer lo disparer solmente assi (que le color nigre del litteras remaneva ibi). E pois que le inscription original ha essite removite, on ha pingite le mesme a plus infra.

Hồ Chí Minh es vermente un homine dubitabile: a un latere ille luctava pro le independentia de Vietnam del Nord contra le franceses e ille poteva attinger le independentia. Isto es laudabile. Ille voleva bontate pro su populo. Ma su ideologia a attinger isto, le communismo non es acceptabile in nostre dies, viste que illo habeva mesmo plus victimas que le nazismo e illo resultava systemas dictatorial in le paises de Terra. Mesmo le systema communista in Vietnam habeva 1 (un) million de victimas. Esque illo es a “oncle Hồ” a ascriber ...? Dunque assi como in Zalaegerszeg naturalmente il ha nulle statua pro memorar nazistas, communistas anque non poterea haber statuas. Mesmo il es inacceptabile, que Hồ Chí Minh appoiava e mesmo parlava esperanto alora, quando nostre interlingua era ja publicate (in 1951)... :-D Ma pro esser seriose: il es vermente multe vices a remarcar, que communistas appoia esperanto o esperantistas son communistas o al minus sinistrales... Io non critica le communistas de Zalaegerszeg de olim, qui ha inaugurate iste statua in 1976, durante le communismo... Illes faceva lor labor secundo lor conviction o ordine superior (dictatorial). O forsan isto era un resistentia celate per le leaders del urbe in 1976 contra le vengiantia del revolution in 1956, ubi Imre Nagy (hic: Hồ Chí Minh...!), le “communista reformate” vinceva le independentia pro su populo e postea – ben que al contrario de Hồ Chí Minh – ille era exequite; pro isto ille, Imre Nagy debeva haber un statua de memoria assi, in le forma de Hồ Chí Minh...? (Alora, durante le communismo NAGY Imre non haberea potite haber un statua proprie.) Si, grande idea: proque non haber un statua de Imre Nagy in loco del statua de Hồ Chí Minh in Zalaegerszeg...? Ille, essente un martyre es appreciate tamben per gentes e partitos patriotic.

(Del resto quando io photographiava iste statua, un evento interessante occurreva: durante facer mi prime photo - vide supra - io subito remarcava, que un viro con barba sedente sur un banco photographa ME. Quando ille remarcava, que io le remarcava, ille subito dirigeva su apparato - plus seriose, que le mie - a un altere direction facente assi, como si ille volerea photographar qualcosa altere. Dunque probabilemente su photo super me non succedeva a ille. Io continuava photographar lo que io voleva, durante que ille faceva altere photos, forsan non super le statua - io non observava isto. Ma interessantemente quando io finiva photographar e retornava a mi bicycletta, ille iva exactemente al loco ubi io comenciava photographar e comenciava facer su proprie photos super le mesme thema... Esque ille era un jornalista? Plus tosto un citatano general, io pensa. De qual ambition ille habeva le mesme idea, como io - photographar le statua de Hồ Chí Minh in Zalaegerszeg...? Esque de un convinction sinistre o dextere...? Esque ille veniva de Jobbik...? Esque ille era un spion o un agente secrete, qui era dirigite a ibi a fin de observar me e facer photos super me...? :-) Io face combinationes: que occurrera alora con me durante le volo a Stockholm ...? O in le traino? O al via al station ferroviari? O in Linköping...? O al retorno...? :-) )

Photos super mi amate urbe de nascentia e del habitation Zalaegerszeg - 19.

Forsan mi lectores fidel ancora memora mi serie "Photos super mi amate urbe de nascentia e de habitation", ubi io presenta photos super mi urbe Zalaegerszeg. Ora io vole revivificar, continuar iste serie, pro esser fidel al titulo URL de mi blog, que contine le nomine Zalaegerszeg (que io includeva in le URL pro scopos touristic...).

Non habente un apparato photographic in ille serie io cercava photos ja disponibile in internet e copiante los io los ha publicate in mi blog. Ma iste photos es rar, se trova in spatios differente del web e son pauc e sovente son de un qualitate que non es le optime.

Ora io, preparante me al incontro nordic de interlingua non solmente annunciava mi participation per inviar le scheda de inscription, reservava e comprava le billets pro le aviones e trainos, ma tamben comprava un camera digital (apparato photographic), del typo Fujifilm Finepix A920 (in color nigre... :-) ). (Ja Lars Rosenmeier in su blog presentava su photos super le previe incontro nordic.) Dunque plus de photos es attendibile in mi blog, forsan ispirate per lo que Mardy usa su blog exclusivemente pro presentar e commentar su photos digital e tamben in le blog de Martein Sveinsson iste factor es un importante elemento constructive.

Primarimente que vos vide iste ancian articulo mie con le photo.

Vos pote vider in illo un photo super le fontana tulipan in le Dísz Tér (Placia Ornamentate) simile a iste photo:


Esque vos sapeva, que illo era recentemente renovate...? :-D

Ora io vos presenta su stato actual, presentante ora ja un photo que io faceva per mi nove apparato:

E le renovation de illo non consisteva solmente de esser aurate, ma tamben de reciper "clausuras" (semi-clausuras) rubie...

... que me non place de un altere puncto de vista del placia; de illac le fontana non pare esser dominante a causa de iste quasi-clausuras plus alte, que diminue le vista del fontana tulipan. Ma le competentes explica iste "clausuras" per lo que on vole attinger un effecto rubie-blanc-verde - le colores national de Hungaria - assi que on face montar (ascender) plantas verde a iste (semi-)clausuras... (Ben que le plantas era plantate ibi solo recentemente, alicun plantas verde ja se vide infra le pilares quasi-blanc, assi le effecto rubie-blanc-verde theoreticamente ja pote functionar, ma io es quasi certe, que un observator superficial non remarca isto e ille probabilemente non (immediatemente) associa al tricolor hungare... Forsan on potera ja remarcar iste effecto postea, quando le plantas verde ja essera plus alte...)

Theatro de pupas - le plus nove video subtitulate in interlingua

Del fin de novembre usque le 20 de decembre io sona in le theatro de pupas del urbe, con tres altere musicos e - naturalmente - actores de pupas, in un spectaculo presentante le costumes folkloric hungare del hiberno. In le television local il habeva un reporto de iste mi nove occupation, vole ben reguardar iste video (subtitulate in interlingua. Si on non vide le subtitulos, que on clicca al symbolo CC).

Vos pote aggrandir le schermo pro vider le subtitulos melio, si vos clicca hic infra al button "Google Video" (o al ligamine supra).

Mi auto in le matino

Mi fratre comprava un camera digital e hodie le matino de bon hora io lo probava. Ecce un de mi prime photos, mi proprie auto (forsan illo es plus belle in le matino...), como illo se vide del balcon de nostre appartamento. Illo es un Lada 2105 (duo milles cinque), se faceva ancora in le tempores sovietic, in 1987 (mille novem centos octanta septe), justo 20 (vinti) annos retro. (Si, io es povre, como le mus del ecclesia...) Illo consume 8 (octo) litros per 100 (cento) kilometros, illo vince le montatas difficilemente, nonobstante illo funge ben, sin problemas e su servicios es sufficiente pro me (pro exemplo illo es comfortabile pro le personas, illo ha un grande spatio pro livrar cosas, etc.).