Radio Interlingua emitte le 43tie vice

Car lectores de mi blog; car ascoltatores de Radio Interlingua!

Le podcast de Radio Interlingua pro martio 2012 presenta un ver varietate de voces e de occurrentias descripte - in 23 minutas.

Primo io fini presentar mi diaros auditive del 19ne conferentia international de interlingua in Chepelare, Bulgaria, con le pecia registrate le 29 de julio, in le ultime vespere commun; ante le partita, quando il habeva le festa final. Memorante le occurrentias in ille vespere, io presenta le registration del duetto de Thomas Breinstrup e Petyo Angelov super "Le garson a conferentia". Post isto un nove contributor se presenta: Erick Fishuk de Brasil. Mentionante alicun actualitates de interlingua, io presenta finalmente le carta postal auditive de Thomas Breinstrup, inviate de Barcelona.

Le emission se ascolta de ci:



Un bon divertimento vos desira:

Le redactor

Radio Interlingua no. 42 parla super le excursion al cavas in le conferentia de interlingua in 2011 e le cornamusas bulgare e hungare

Car lectores e ascoltatores de Radio Interlingua!

Le 27 de julio in 2011, quando nos, le participantes del 19ne conferentia international de interlingua in Chepelare, Bulgaria visitava duo cavas in le montanias de Rhodope, al entrata de un del cavas io habeva incontrate spontaneemente un sonator de cornamusas bulgare, cuje cornamusas io mesmo probava, essente un sonator del cornamusa hungare. In le podcast no. 42 de Radio Interlingua (pro februario 2012) io presenta tamben iste registration (facite per Lars Rosenmeier) e mi registrationes local, quando Svetlyo Zhilev, le cornamusista al cava mesme sona su cornamusas.

In addition a iste thema io presenta, que es un cornamusa in general, presenta e compara le cornamusas hungare e bulgare e vos pote audir de altere registrationes de alterubi (ante e post le conferentia), como io mesme sona mi proprie cornamusa hungare.

Tote isto es in le quadros de mi diario auditive, que io registrava in Chepelare le 28 de julio 2011, un die post le visitas al cavas.

Vos pote ascoltar le emission cliccante al symbolo infra.

Vos pote leger le articulo super le cornamusa in le Wikipedia interlinguaphone, mentionate in le emission al ligamine http://ia.wikipedia.org/wiki/Cornamusa .

Un bon divertimento informative io desira a vos

vostre redactor:

Péter Kovács

Le prime emission de Radio Interlingua pro le nove anno 2012 es preste e publicate

Car lectores de iste blog; car ascoltatores de Radio Interlingua!

Io desira a tote vos un bon anno nove 2012 e io spera, que vos va sequer mi blog e le emissiones de Radio Interlingua anque in iste nove anno.

Qualcosa extraordinari occurreva durante le conferentia international de interlingua in Chepelare, Bulgaria, in le estate de 2011. Vos ja poteva accostumar vos, que io, le redactor mesme face le interviews con altere parlatores de interlingua, ma iste vice io mesme ha essite interviewate per le jornalista danese Thomas Breinstrup. Thomas me offereva su interview pro utilisar lo in Radio Interlingua, ma prohibiva pro me, que io redige mi proprie parlar. Assi io debe demandar vostre excusas, que io non parla si fluentemente e sin errores, al qual vos ja poteva accostumar vos previemente – sovente se audi de mi gorga sonos de hesitationes, repetitiones de syllabas initial, etc. Nonobstante io pensa, que iste interview anque pote esser interessante pro vos.

Mi co-citatano urban Csaba Kocsis, ben que previemente ille era un musico folkloristic, como io, non utilisa elementos folkloristic in su compositiones, al minus non directemente. Ma in su musica que io presenta in iste podcast ille usa exceptionalmente non un melodia, que ille mesme haberea inventate, ma un melodia folkloric hungare, que veni de un gruppo ethnic hungare nominate csángós, qui habita in le region Moldova de Romania. Iste melodia ha su typo e su rhythmo originante del medievo. Ben que le mesme melodia es repetite in iste pecia musical plure vices in differente altitudes del tono; io pensa, illo pote esser interessante, proque in iste musica ultra le ben cognoscite instrumentos, le violino e gitarra se usa anque altere instrumentos acustic, que son plus rarmente usate: le mandolino, le flauta, le harpa de bucca e le viola de tres chordas. Tote iste instrumentos es sonate solmente per Csaba Kocsis mesme – ma naturalmente non al mesme tempore: ille utilisava le possibilitates technic pro registrar e compilar le sonos de tote iste instrumentos.

Vos pote ascoltar le emission directemente cliccante ci, al symbolo.

Bon divertimento!

Le 40me podcast de Radio Interlingua

Car ascoltatores, car lectores!

In le 40me emission de Radio Interlingua io continua presentar mi diario auditive, que io registrava in le 19ne conferentia international de interlingua in Chepelare, Bulgaria super mi experientias, impressiones, etc. Iste vice se audi mi registrationes del 26 de julio 2011.

Quando io - registrante mi diario auditive - habeva parlate al microphono sur le commun balcon del hotel, ubi nos participantes habitava, occurreva, que Martijn Dekker, le interlinguista nederlandese appareva sur le balcon, al camera vicin. Assi io faceva un mini-interview spontanee con ille, in le quadros de iste pecia del diario auditive.

Postea io ancora presenta mi breve registration, que io faceva ja in mi camera, retornante del balcon.

In iste podcast vos potera audir un pecia music de Csaba Kocsis, con le titulo "Farewell" e le novas super le veniente Incontro Nordic de Interlingua.

Le podcast se ascolta directemente de ci, del basso de iste pagina.

Bon passatempore con iste 13 minutas vos desira:

le redactor.

Radio Interlingua "emitte" de Bachkovo

Car ascoltatores, lectores!

Post le composition de Csaba Kocsis (con le titulo jocante con le parolas Peace /~ Piece/ of Music) in le emission no. 039 de Radio Interlingua io continua publicar mi registrationes (subjective reportos auditive), que io faceva in Bulgaria, in le 19ne conferentia international de interlingua iste estate in Chepelare. Primo vos potera audir mi registrationes del 25 de julio 2011, le die del prime excursion del conferentia, in le monasterio de Bachkovo; postea un registration facite in un die posterior, totevia parlante super iste excursion. E finalmente que vos ascolta un registration de novo del die al monasterio! Al fin del podcast vos pote audir bon novas de interlingua per Sven Frank, presidente del Union Mundial pro interlingua, qui reporta super le uso active de interlingua, que occurreva recentemente per duo firmas como un cooperation international.

Le redactor Péter Kovács vos desira un bon passatempore con Radio Interlingua, cuje 39ne emission pote esser ascoltate p. ex. cliccante a ci:

Radio Interlingua no. 38 presenta registrationes del 19ne conferentia international de interlingua in Chepelare, Bulgaria

Sequente le ordine chronologic de presentar mi registrationes facite in le 19ne conferentia international de interlingua in Chepelare, Bulgaria; ora io ha publicate duo de illos, del prime die totalmente passate in Chepelare, i. e.: le 24 de julio 2011. Isto comprehende, que io continua presentar le mini-interview facite con le interlinguista danese Lars Rosenmeier, cuje prime parte vos poteva audir in le previe emission. Post alicun musica io presenta mi mini-interview registrate per mi camera de photos ante le restaurante del hotel; facite con Donald Gasper de Hongkong e Thomas Breinstrup de Danmark - le duo jornalistas.

Clicca a ci pro ascoltar le emission:



Pois que le secunde interview era facite per un camera de photos, on pote non solmente ascoltar, ma naturalmente tamben spectar lo; sur mi proprie sito in Youtube: http://www.youtube.com/watch?v=38vf_m2QcTI&feature=channel_video_title .



Bon divertimento!

Radio Interlingua no. 37 presenta mini-interviews del conferentia

Car ascoltatores de Radio Interlingua; car lectores de mi blog!

Vos certo ancora memora, que in le emission precedente de Radio Interlingua io presentava mi proprie reportos, registrate in le matino del 24 de julio 2011 - le die post le arrivata a Chepelare, Bulgaria; ubi le 19ne conferentia international de interlingua habeva loco. Ancora in ille die io faceva alicun mini-interviews con participantes, proque io habeva essite curiose super lor impressiones, experientias usque alora. In le podcast no. 37 de RI io comencia presentar istos; primo vos potera saper, como hypnotisava le actual presidente de UMI le previe presidente; dunque: vos va audir Barbara Rubinstein de Svedia; e post le musica le prime parte del mini-interview con le activista danese Lars Rosenmeier. Le pecia music de KOCSIS Csaba in iste emission ha le titulo: Steps on Rock.

Pro ascoltar le emission clicca ci, al basso!

Get this widget | Track details | eSnips Social DNA

Radio Interlingua no. 36 parla super le conferentia de interlingua in Bulgaria

Car amicos,

Le 36te podcast de Radio Interlingua (pro augusto 2011) presenta le prime duo "mini-blogs auditive" del redactor, i. e.: su personal reportos (forsan plus tosto subjective...?) super le occurrentias e impressiones al 19ne conferentia international de interlingua in Chepelare, Bulgaria, que occurreva inter le 23 e le 30 de julio; ma iste duo registrationes se faceva in le matino de 24 in le loco del occurrentias, i.e.: Chepelare.

Le emission se discarga o se ascolta cliccanta a ci, infra.

Bon passatempore con Radio Interlingua!

Get this widget | Track details | eSnips Social DNA

Le 34te emission de Radio Interlingua (pro junio 2011)

Car lectores, respectivemente ascoltatores!

In le podcast no. 34 de Radio Interlingua (pro junio 2011) io presenta le final parte del interview con Thomas Breinstrup, registrate in 2008, in Linköping, Svedia, ubi le 11me Incontro Nordic de Interlingua habeva loco.

Io le ancora demanda super le possibile causas de lo que interlingua es plus popular in le paises scandinave, que alterubi.

Le sequente thema de nostre conversation es cercar le causas del facto, que interlingua non es assatis popular e divulgate in le paises romanophone, respectivemente al gente parlante linguas romanic, al quales interlingua sta multo proxime.

Finalmente io demanda le activista danese: que ille pensa super le possibilitates de interlingua in le futuro e super instrumentos efficace a divulgar lo.

Parlante de romanophonos, le breve pecia musical de Csaba Kocsis iste vice es un "Samba"!

Pro ascoltar le emission clicca a ci, infra!

Get this widget | Track details | eSnips Social DNA

Le 33tie emission de Radio Interlingua (pro maio 2011)

Car lectores, car ascoltatores!

Le emission de Radio Interlingua pro maio 2011 es preste e publicate!

Nos continua le interessante interview registrate in 2008, in Linköping, Svedia, in le incontro nordic organisate ibi con Thomas Breinstrup, activista danese de interlingua.

In iste parte io le demandava super su rolo de ille, como redactor del revista nordic "Actualitates - Interlingua i Norden" e como moderator de incontros, conferentias de interlingua; super su activitate in colliger documentos del historia de interlingua (publicate in http://www.interlingua.com/historia/ ); e como a plure mi interviewatos de alora, io poneva le question tamben a ille: que ille pensa super le possibile causas de lo que interlingua es plus popular in le paises scandinave, que alterubi in le mundo.

Anque iste vice mi co-citatano urban e co-musico Csaba Kocsis provide su breve musica original al fin del emission.

Le redactor, Péter Kovács spera, que iste emission se provara tamben un bon passatempore pro vos.

Pro ascoltar le podcast clicca a ci, a basso!

Get this widget | Track details | eSnips Social DNA

JESZENSZKY Ferenc moriva

Car lectores!

Io debe divider con vos un nova vermente triste: Ferenc Jeszenszky, physico, prime e eminente representante de interlingua e de UMI in Hungaria, scriptor del supplemento hungarophone del manual de interlingua per Ingvar Stenström, membro del Comission Linguistic de UMI, revisor del traduction hungarophone per Tamás Racskó de Interlingua Grammar per Gode e Blair moriva le 21 de april 2011, in su etate de 78 annos. Secundo le lettera e-postal adressate a Donald Gasper le interramento de Ferenc Jeszenszky va haber loco in le cemeterio de Törökbálint, le 11 de maio a 15 horas... :-(


Felicemente su hereditage non dispare; ultra su obras textual remane anque su voce, proque in 1985, in le conferentia international de interlingua in Taastrup (Danmark) Thomas Breinstrup lo registrava, quando ille legeva duo novellas de Alexander Gode. Radio Interlingua presentava ambe registrationes in su emissiones no. 5 e 7 (clicca al numeros ligaminate).

Multe annos postea io faceva con ille un interview in Budapest, vide iste photo que io faceva justo alora, post le interview in su casa (e clicca a illo si vos vole aggrandir lo):


Io presentava anque iste interview in Radio Interlingua; le prime parte in le emission no. 5; e le secunde parte in le podcast no. 6 (clicca al numeros ligaminate).

Lege anque un biographia super ille ci (sur le pagina del sito de UMI super le historia de interlingua)!

Car Ferenc,

R.I.P.!

Radio Interlingua no. 32 continua presentar le interview con Thomas Breinstrup in 2008

Car ascoltatores e lectores!

In le podcast no. 32 de Radio Interlingua (pro april 2011) vos essera ducite un poco retro in le tempore, proque continuante presentar le interview con Thomas Breinstrup in 2008 vos potera audir qualcosa super le historia de jornalismo in interlingua.

Le plus active jornalista de interlingua parlara super le antecessores de Panorama – istos es: le Currero e le Heraldo de interlingua. Ille mesme redigeva Heraldo durante sex annos in le 80s ante le fusion de iste duo revistas sub le nomine “Panorama in interlingua”. Postea ille parlara super Panorama mesme – que es le revista de interlingua actualmente official de UMI.

Ma ante toto ille narrara su prime contacto con interlingua e como ille cognosceva le lingua.

On pote abonar se a Panorama, que es de alicun tempore obtenibile tamben in formato digital in le paginas web de UMI, vide

http://www.interlingua.com/panorama ,
http://www.interlingua.com/panorama-abonamento
e
http://www.interlingua.com/official/2009-10-31-panoramadigital .

On pote navigar anque inter le indices del contentos de tote le exemplares de Panorama ab 2007:

http://www.interlingua.com/official/2011-03-07-indices .

Iste vice le pecias music per Csaba Kocsis ha le titulos: 1. Latin2 e 2. Phantasy; de su serie "Zenei egypercesek" ("Musicas de solo un minuta").

Memora inscriber vos ancora hodie al conferentia international de interlingua in Chepelare, Bulgaria, proque hodie, le 1 de maio es le dato final de inscriber se! A isto vos rememora tamben Radio Interlingua al initio de su programma no. 32.

Le redactor Péter Kovács vos desira un bon divertimento!

Clicca ci pro ascoltar le emission:

Get this widget | Track details | eSnips Social DNA

Conferentia de interlingua, cobza e un interview in Radio Interlingua no. 31

Car lectores, car ascoltatores!

Le 31me (trenta-prime) podcast de Radio Interlingua (pro martio 2011 /duo milles dece-un/) es in-linea!

Ecce le contento:

Primo illo vole avisar uno super le dato final de inscriber vos al conferentia international de interlingua in Chepelare Bulgaria. A saper: illo es le 1 (prime) de maio! Que vos vos inscribe si tosto como possibile, pro un septimana agradabile inter le montanias bulgare! Radio Interlingua essera presente e vole incontrar su ascoltatores tamben personalmente! :-)

Vos ja multe vices poteva ascoltar le contributiones del interlinguista active: Thomas Breinstrup de Danmark. Ma esque vos ja pensava, que il esserea bon cognoscer le plus; saper plus super ille? A isto vos adjuta mi interview con ille, facite al 11me (dece-prime) incontro nordic de interlingua in Linköping, Svedia, 2008 (duo milles octo). In iste prime parte presentate del interview se crea un situation rarissime, quando on non le audi parlante super interlingua, proque io le demandava definitivemente super su altere hobbys (e su profession, familia).

Iste vice le musicas veni de un amico musico Gábor Rezes, qui habita in Keszthely - un urbe hungare al ripa del famose laco Balaton. Ille sona un instrumento multo ancian, le koboz o cobza, que es un variante folkloric del lut medieval. Olim iste typo simplificate del lut era divulgate in tote le Hungaria historic, ma hodie illo superviveva solo in le provincia Moldova de Romania, ubi lo usa hungaros, rumanos e tsiganos (providente le musica pro ambe le populos).

Le sonoritate del kobza es multo ancian e simile al sonoritate del instrumentos parente como le dombra al kazakhos e altere tal instrumentos parente in le ambiente centro-asiatic e caucasian. Primo vos potera ascoltar un composition traditional in le stilo hungare de Moldova, ma le secunde pecia musical de Gábor Rezes prova, que on pote sonar musica moderne tamben per iste instrumento ancian...

Clicca al basso pro ascoltar le podcast!

Get this widget | Track details | eSnips Social DNA

Radio Interlingua pro februario 2011

Car lectores, ascoltatores!

Le 30me (trentesime) emission de Radio Interlingua arrivava al rete. Illo es ascoltabile directemente ci, al basso.

Le contento de novo es varie.

Al initio io face propaganda pro le 19ne (dece-none) conferentia international de interlingua. Le dato final de inscriber se a illo se approxima! Illo es le 1 (prime) de maio, ma que vos vos inscribe si tosto como possibile con tote vostre familias! Ben que illo essera organisate in le pais de Sud: Bulgaria; in Chepelare, que se trova inter le montanias le climate es agradabile mesmo in le estate. Vos pote trovar tote le informationes necessari a inscriber vos al conferentia sur le pagina http://www.interlingua.com/conferentia/2011 .

Secundo io presenta le 4te (quarte) – i. e. final – parte de mi interview con Ingvar Stenström, registrate in Linköping, Svedia, 2008 (duo milles octo), in le 11me (dece-prime) Incontro Nordic de interlingua. Il se tracta de themas interessante: le chances de interlingua sur le strata mundial de linguas e inter le juvenes; le attitude de juvenes a apprender linguas estranier, le situation del inseniamento de linguas in Svedia, le lingua anglese, etc. Tote isto: in solo minus que octo minutas!

Postea veni un thema minus seriose: Erik Enfors – inspirate per mi traduction super le Familia Tante, presentate in le previe emission – ora presenta alicun membros plus famose del familia Eric.

In iste podcast io de novo presenta pecias music de mi co-citatano urban, ex-collega musico Csaba Kocsis, qui compone e registra su proprie musica solo a su proprie divertimento, como hobby.

Io desira un emission educative e divertente pro vos iste vice tamben!

A revider in Chepelare, Bulgaria, inter le 23 (vinti-tres) e 30 (trenta) de julio!

Get this widget | Track details | eSnips Social DNA

Offerta de Radio Interlingua pro januario 2011

Car ascoltatores de Radio Interlingua; car lectores de mi blog!

In le prime emission de Radio Interlingua pro le nove anno 2011 (duo milles dece un) primo Sven Frank, presidente del Union Mundial pro Interlingua saluta vos de iste occasion.

Le tempore e le loco del conferentia international de interlingua iste anno es ja fixe. Illo essera organisate in Bulgaria, in julio. Super isto narra a vos plus detaliatemente le active interlinguista danese: Thomas Breinstrup, redactor del revista Panorama in Interlingua.

Postea seque un parve obra litterari, que io traduceva del lingua hungare a interlingua super le familia Tante. Iste obretta humoristic originalmente usa quasi exclusivemente parolas de origine latin in le hungaro pro crear le nomines personal humoristic; assi il non era troppo difficile pro me traducer lo in interlingua... Vos pote tamben leger le texto ci, in mi blog personal, sequente iste ligamine: http://zalaegerszeg.blogspot.com/2011/01/le-familia-tante.html

Finalmente sequera le salutation de Carlos Soreto, le secretario general de UMI al occasion del 60me (sexantesime) anniversario de interlingua iste anno.

Io, Péter Kovács, le redactor de Radio Interlingua spera, que anque iste emission va esser utile e interessante pro vos.

Vos pote ascoltar le podcast cliccante directemente a ci, sur le symbolo infra.

Get this widget | Track details | eSnips Social DNA

Radio Interlingua in septembre reporta super le vita active del lingua

Ora io vos recommenda un emission excellente de Radio Interlingua. Iste vice Radio Interlingua no. 26 (pro septembre 2010) ha essite redigite e moderate per Thomas Breinstrup, activista del Union Danese pro Interlingua, redactor del revista "Panorama in interlingua", a causa de mi altere obligationes. Gratias a ille pro discargar me iste vice.

Iste emission es vermente informative e interessante:

In le rubrica "Actualitates de interlingua" on es informate super le vita active circa interlingua: reuniones e cursos regional e national se ha recomenciate post le estate; tosto occurrera le incontro franco-german de interlingua in le urbe Rastatt, Germania.

Postea es presentate un interview fresc de Thomas Breinstrup con Erik Enfors, activista svedese de interlingua, qui participava in le team del Societate Svedese pro Interlingua in presentar e vender libros in le grande feria de libros, recentemente organisate in Svedia. Erik reporta super le experientias, le reactiones del gente super interlingua, etc.

Le redactor in chef, Péter Kovács, anque in le nomine del redactor del emission Thomas Breinstup spera, que iste podcast vos anque placera.

Get this widget | Track details | eSnips Social DNA

Conversation in Radio Interlingua super le 12nde Incontro Nordic

Car ascoltatores (lectores)!

In le 25te (vinti-quinte) emission de Radio Interlingua pro augusto 2010 (duo milles dece) nos presenta un grande reporto actual del 12nde (dece-secunde) Incontro Nordic de interlingua que habeva loco in le fin de julio e le initio de augusto (2010) in Kalmar, Svedia.

Le secretario general del Union Mundial pro Interlingua, Sven Frank, e le redactor de Panorama, Thomas Breinstrup, qui ambes participava in le incontro narra super multe cosas que eveniva la.

Le musicas de solo un minuta o al maximo duo iste vice tamben se origina de mi amico-musico, co-citatano urban, Csaba Kocsis.

Le prime pecia musical que ille compilava se basa a un melodia folkloric hungare del typo le plus antique in le musica folkloric hungare. Iste typo es nominate "la-pentatonic descendente", in le qual le tertie e le quarte parte del melodia es un version repetite del prime e secunde partes, ma plus basse con un quinta. Iste typo de melodias es usual in Eurasia Central, de Japon, Mongolia, China trans le steppa de Europa Oriental usque le Bassino Carpatian (Hungaria), dunque: primarimente inter le descendentes de populos hunnic e turc.

Bon divertimento vos desira:

Péter Kovács, le redactor

Clicca ci pro ascoltar lo:

Le 24te emission de Radio Interlingua

Car interessatos, qui ascolta le emissiones de Radio Interlingua!

Iste vice in su emission pro julio 2010 Radio Interlingua presenta solo duo themas.

Io non sape exactemente, ma forsan in Svedia se realisava exclusivemente, que on inseniava interlingua officialmente in gymnasios, como parte del programma de studios. Como? In qual forma? Ingvar Stenström, professor gymnasial retirate explica toto, in le tertie parte del interview facite con ille in 2008, in Linköping, Svedia, ubi le 11me Incontro Nordic de interlingua habeva loco.

A proposito del 11me Incontro Nordic, in le fin de julio occurre le 12nde in Kalmar, Svedia. Le redactor de iste radio non pote participar in illo, ma faceva un salutation vocal al participantes. Isto essera presentate verso le fin de iste emission.

Ecce su texto:

"Car participantes, nordicos e non-nordicos!

Io spera, que iste voce es familiar pro le majoritate de vos. Isto es io, Péter Kovács, le voce de Radio Interlingua. Io admitte, iste voce non es le plus belle o le plus forte, ma que facer...? io es le redactor e il es natural, que mi voce se audi le plus frequentemente in iste radio.

Il es regrettabile, que io non pote participar iste vice in le incontro nordic, in que io participava in Linköping, duo annos retro – illo era multo bon, io ha bon experientias e belle memorias super illo.

Ma io spera, que iste incontro anque va fortificar le collaboration inter le organisationes nordic de interlingua, pro le scopo de facer iste belle lingua plus cognoscite in vostre region. Non oblida, que vostre collaboration es un lumine pro altere regiones, ubi il non ha tal collaboration inter le organisationes national o il non ha mesmo organisationes national, o non tanto active.

Bon labor, bon practicamento de interlingua e bon reposo vos desira:

Péter Kovács"

Le musicas presentate es de Jeff Wahl, de su album Guitarscapes. Le pecias in le ordine, como illos sona in le emission son le sequente:

- Forever

- Guinevere

- Repetition.

Io spera, que vos va trovar iste podcast tamben interessante!

Get this widget | Track details | eSnips Social DNA

Le sequente podcast va continer un conversation inter le participantes del 12nde Incontro Nordic de interlingua super lor experientias, impressiones in Kalmar, Svedia. Vos es dunque benvenite ascoltar ille emission tamben.

A reaudir!

Le prime emission estive de Radio Interlingua in 2010

Ecce, arrivava le prime emission estive de Radio Interlingua pro junio 2010.

Iste vice io continua presentar le interview interessante con Ingvar Stenström, pionero de interlingua desde le 1950s, ora secretario general del Societate Svedese pro Interlingua. Le registration era facite per me in le 11me Incontro Nordic de Interlingua in Linköping, Svedia, in 2008.

Recitante le historia del movimento de interlingua primarimente in le paises nordic Ingvar mentiona nomines de altere linguas auxiliar o refere a lor adherentes, que io pensa, debeva esser un poco explicate pro le ascoltatores laic.

Ultra interlingua, le lingua auxiliar le plus mentionate in iste interview es interlingue, o previemente appellate: occidental.

Mesmo in iste curte portion de dece minutas del interview nostre "Interlingvar" parla super multe themas: proque ille appoia justo interlingua; qui besonia interlingua. Ille parla super le movimento de interlingua in le 50s e postea; super le rationes de que interlingua es successose in paises nordic. Particularmente son mentionate le incontros scandinave / nordic e le importantia de informar super interlingua in le medios de massa. E finalmente io le poneva le question: proque interlingua non es popular a romanophonos?

Anque iste vice le musicas veni de mi ex-collega musico, Csaba Kocsis, qui habita in le mesme urbe como io; de su album Zenei egypercesek (Musicas de un minuta). Le prime pecia que se audi ha le titulo de Mono-Tone, le secunde: G-dúr master.

Le redactor Péter Kovács vos desira un bon passatempore iste vice con Radio Interlingua!

Le libretto de Ingvar Stenström, mentionate in le emission ha le titulo: Occidental-Interlingue: Factos e fato de un lingua international e pote esser ordinate sub le ligamine supra.

Le editor es le Societate Svedese pro Interlingua, 1997. Le libretto ha 40 paginas A5; le numero ISBN es: 91-971940-2-6.

Le description scribe:

"Occidental, autorate per le estoniano Edgar de Wahl, esseva un precursor de interlingua. Ingvar Stenström, mag. fil. in Svedia, ha examinate le historia interessante del lingua e colligite pro le prime vice le factos de su developpamento e diffusion. Ab isto, ille presenta le conclusiones que pote interlingua apprender del fato de Occidental, e como pote interlingua usar iste experientias pro assecurar su diffusion continue."

Le obra es ordinabile anque directemente a Piet Cleij, Kometenlaan 38, 3721 JT Bilthoven, Nederland e costa 6 €.

Le 22nde emission de Radio Interlingua (pro maio 2010) finalmente arrivate

Io, le redactor de Radio Interlingua, veniva al puncto de rediger un del plus longe interviews, que io faceva usque ora. Illo es con Ingvar Stenström, activista svedese de interlingua e durava quasi cinquanta minutas sin redaction! Pro isto io decideva presentar le interview in plure partes. Ecce le prime in le 22nde podcast de Radio Interlingua, facite in Linköping, Svedia in 2008, in le incontro nordic de interlingua.

Iste vice vos potera audir experimentos musical de un mi collega-musico de mi urbe Zalaegerszeg: Csaba Kocsis. Ille ha facite parve compositiones durante solo un minuta o al maximo duo. Le titulo del prime pecia es: D-moll laza (i. e.: Legier in D-minor), del secunde: Latin.



Bon divertimento!