23.6.08

Statuas in “discussion” - 1.

Hồ Chí Minh, le leader vietnamese...



Forsan inspirate per le serie de Erik Enfors in su blog (Alcun sculpturas public in Varberg), io anque presenta un poco le statuas public de Zalaegerszeg, registrate per mi proprie camera photographic. Mesmo io comencia con statuas discutite, que ha actualitate politic recentemente.

Anno 1976 (mille novem centos septanta sex). Dato: le 30 (trenta) de april. In Hungaria il es socialismo (communismo), dunque: un systema politic dictatorial. In Zalaegerszeg on inaugura le statua de Hồ Chí Minh. Io non meditava re isto alora, io habeva un anno... :-) Ma nihil occurre con le statua durante le decennios, nihil mesmo post le cambio del systema politic in 1989 / 90.

32 (trenta tres) annos postea totevia occurre qualcosa: verisimilemente le 28 (vinti-octo) de martio 2008 (duo milles octo) le presidente local del partito Jobbik Magyarországért Mozgalom (Movimento pro un Hungaria Melior) ha coperite le statua de Hồ Chí Minh (vide supra) in Zalaegerszeg per un folio nigre. (Io ha vidite le statua alora con le folio nigre del fenestra de un bus local que ha su route ibi.) Le partito radical de dextere ja ha initiate le remotion del statua in 2005, ma semblamente le governamento del urbe (ben que guidate per un burgomaestro dextere) ageva nihil in iste respecto. Postea Jobbik dirigeva un question al governamento, ma nulle responsa arrivava.

Proque habe un representante del dictatura sanguinari communista un statua in un loco public de un urbe in Hungaria, ubi – on assere – le dictatura communista ja ha passate e il ha – on assere - “democratia”? Isto es vermente incomprensibile non solmente pro le Jobbik. On scribe, le dictatura communista in Vietnam requireva un million de victimas e Hồ Chí Minh es un persona vermente discutite mesmo in Vietnam. Il ha nulle obligation de haber statuas public de tal homines in Hungaria, in mi urbe. Il es ver, le statua de Lenin era removite in Zalaegerszeg post le cambio del systema politic in Hungaria, ma non illo de “oncle Hồ”. Vos pote vider al photo sequente, que es ora in le loco del statua de Lenin de olim, que io memora ancora de mi infantia. Illo era un vermente bon labor artisticamente, un multo grande statua... ma philosophicamente, politicamente naturalmente illo non plus poteva haber loco ibi. Io non ha trovate ulle photo vetule del 80s o plus previemente in internet super le statua de Lenin in Zalaegerszeg e io non sape, ubi le statua se trova ora – si illo ancora existe. (Secundo un sol information in le internet illo se trova in le parco de sculpturas in Budatétény – Budapest, ma io non poteva verificar iste sol information.)

Isto non es le optime photo mie, ma quando io faceva un tour per mi bicycletta intra le urbe pro facer photos a vos, sur le route ab le statua de Albert Wass verso le statua de Hồ Chí Minh se trovava iste loco, le statua “Ex-Lenin” como io lo appella (lo que es sur le loco del statua Lenin de olim) e io decideva facer un photo rapidemente anque re illo... Forsan a iste photo redigite on vide plus:


Ma retornante a Hồ Chí Minh: brevemente post iste action del Jobbik le folio nigre era removite. Esque officialmente per le governamento local...? Esque inofficialmente, secretemente per individuos communista o “communista-phile” o sinistre-liberal p. ex. durante le nocte...? O per representantes de partitos "minus radical" e/o sinistre-liberal durante le die, officialmente o al minus publicamente? O mesmo: secretemente o publicamente per esperantistas revolutionari, viste que Hồ Chí Minh parlava e appoiava anque esperanto...? Io non sape. Ma le capite del statua Hồ Chí Minh ora de novo se vide assi, como vos lo vide sur mi sequente photo e le Jobbik usque ora non lo ha recoperite per folio nigre:


Ma intertanto ha apparite un inscription sur le fundo detra le statua (io non crede, que illo era pingite a ibi per le Jobbik durante su action official de coperir le statua per folio; io crede, le inscription veniva plus tarde al monumento). Vamos ir plus proxime, a fin que nos vide, que es scribite per spray de pictura al fundo ubi se vide le populo de “patre H”, assi facente theoreticamente un bon effecto tridimensional:

Que? Vos non pote leger lo mesmo de iste puncto de vista? Alora io vos monstra le inscription de un altere puncto de vista, ubi le statua non lo coperi. Ecce:


Que vos dice ora? Le-bon-ta-ni? Vos pote leger le parola, ma vos non lo comprende? Ah, vos non es hungarophonos...:-P Alora io lo traduce a vos. “Lebontani” significa “demolir lo” - intendite in imperativo. Qui ha pingite isto al fundo detra le statua? Io non sape, probabilemente alicuno secretemente. Vos pote vider, que le parte superior de iste parte del monumento es plus nigre, que le inferior. Isto es proque previemente le mesme inscription se videva plus superiormente (io videva isto alora) e on poteva facer lo disparer solmente assi (que le color nigre del litteras remaneva ibi). E pois que le inscription original ha essite removite, on ha pingite le mesme a plus infra.

Hồ Chí Minh es vermente un homine dubitabile: a un latere ille luctava pro le independentia de Vietnam del Nord contra le franceses e ille poteva attinger le independentia. Isto es laudabile. Ille voleva bontate pro su populo. Ma su ideologia a attinger isto, le communismo non es acceptabile in nostre dies, viste que illo habeva mesmo plus victimas que le nazismo e illo resultava systemas dictatorial in le paises de Terra. Mesmo le systema communista in Vietnam habeva 1 (un) million de victimas. Esque illo es a “oncle Hồ” a ascriber ...? Dunque assi como in Zalaegerszeg naturalmente il ha nulle statua pro memorar nazistas, communistas anque non poterea haber statuas. Mesmo il es inacceptabile, que Hồ Chí Minh appoiava e mesmo parlava esperanto alora, quando nostre interlingua era ja publicate (in 1951)... :-D Ma pro esser seriose: il es vermente multe vices a remarcar, que communistas appoia esperanto o esperantistas son communistas o al minus sinistrales... Io non critica le communistas de Zalaegerszeg de olim, qui ha inaugurate iste statua in 1976, durante le communismo... Illes faceva lor labor secundo lor conviction o ordine superior (dictatorial). O forsan isto era un resistentia celate per le leaders del urbe in 1976 contra le vengiantia del revolution in 1956, ubi Imre Nagy (hic: Hồ Chí Minh...!), le “communista reformate” vinceva le independentia pro su populo e postea – ben que al contrario de Hồ Chí Minh – ille era exequite; pro isto ille, Imre Nagy debeva haber un statua de memoria assi, in le forma de Hồ Chí Minh...? (Alora, durante le communismo NAGY Imre non haberea potite haber un statua proprie.) Si, grande idea: proque non haber un statua de Imre Nagy in loco del statua de Hồ Chí Minh in Zalaegerszeg...? Ille, essente un martyre es appreciate tamben per gentes e partitos patriotic.

(Del resto quando io photographiava iste statua, un evento interessante occurreva: durante facer mi prime photo - vide supra - io subito remarcava, que un viro con barba sedente sur un banco photographa ME. Quando ille remarcava, que io le remarcava, ille subito dirigeva su apparato - plus seriose, que le mie - a un altere direction facente assi, como si ille volerea photographar qualcosa altere. Dunque probabilemente su photo super me non succedeva a ille. Io continuava photographar lo que io voleva, durante que ille faceva altere photos, forsan non super le statua - io non observava isto. Ma interessantemente quando io finiva photographar e retornava a mi bicycletta, ille iva exactemente al loco ubi io comenciava photographar e comenciava facer su proprie photos super le mesme thema... Esque ille era un jornalista? Plus tosto un citatano general, io pensa. De qual ambition ille habeva le mesme idea, como io - photographar le statua de Hồ Chí Minh in Zalaegerszeg...? Esque de un convinction sinistre o dextere...? Esque ille veniva de Jobbik...? Esque ille era un spion o un agente secrete, qui era dirigite a ibi a fin de observar me e facer photos super me...? :-) Io face combinationes: que occurrera alora con me durante le volo a Stockholm ...? O in le traino? O al via al station ferroviari? O in Linköping...? O al retorno...? :-) )

7 comments:

torrente said...

Car Peter!
Io spera que tu exaggera tu angustias re le photographo.
con interesse io ha legite iste texto re Bac Ho nam io intende mentionar un poco re su vita remarcabile in mi discurso in Incontro Nordic (si mi discurso essera approbate).Io non del toto supporta su ideaoligia ma io debe admitter que io es impressionate per su capacitate e su vita simple sin pretensiones personal.

Erik

Petro Ferrero de Hungaria said...

Car Erik

Quando alicuno photographa uno durante un acto que pote esser tractate mesmo como un acto politic (photographar un statua discutite politicamente, pingite per inscriptiones per spray, que es illegal) on pote pensar a qualcunque cosa, facer combinationes mental, proque ille face isto. Io scribeva mi pensamentos re isto naturalmente (semi-)humoristicamente. E io simplemente non ama, si alicuno me photographa sin permission. Esque tu incontrava (simile) statuas de Ho Shi Minh in Vietnam? Quanto io sape, iste in Zalaegerszeg es le sol statua de ille in Hungaria (o un del duo)...

Laurentio said...

Un folio? Ben, si il esseva un "ang.: leaf" le vento probabilemente lo ha portate via. ;)

Ma plus realisticamente tu parla de un folio tenue de metallo? Non pote alcuno simplemente haber furate lo pro usar lo pro alco?

Io ya non cognosce ben le situation politic de Hungaria, ma tu contemplationes da quasi le impression que illo es ancora un stato de dictatura communista solmente disguisate como un democratia?

A proposito, io pensa que tu ha con iste ultime articulos battite mi record pro le articulo le plus longe! :)

(Isto me recorda que tu non ancora ha commentate mi articulo del monarchia - o ulle altere articulos mie in le ultime duo annos, del resto!) :P

Laurentio said...
This comment has been removed by a blog administrator.
Petro Ferrero de Hungaria said...

Si, le anglese "leaf" tamben ha un significato, que le hungare "fólia" ha. Il non se tracta de folio de arbore (como le prime significato del anglese "leaf"), ma de un folio plastic, que on usa p. ex. a situlas de immunditias domestic. Io crede, illo non es de metallo.

Hungaria non plus es un dictatura communista, ma le (ex-?)communistas (le partito socialista) governa le pais anque hodie. Mesmo le partito liberal lassava le coalition, dunque nos de novo ha un "systema de un partito", i. e.: un governamento consistente de solo un partito (justo como il es usual in dictaturas)... Ma le potentia, que illes servi, non es le mesme; illo se cambiava desde le tempores communista: illo non plus es le potentia communista del Union Sovietic, ma le potentia del grande capital monetari international... Il es ver, le mesme homines servi iste altere potentia, qui olim serviva le potentia del communismo international con le cambio, que illes non plus se nomina "communistas", ma "socialistas" o "social-democrates"...

Anonymous said...

good start

Anonymous said...

quello che stavo cercando, grazie