13.12.06

Le die de Lucia

Hodie es le die de Lucia, quando le die es le plus curte e le nocte es le plus longe. Iste die ha multe relationes folkloristic, le quales io non vole detaliar hic (isto faceva multe alteres, melio que io poterea facer). Ma in le autobus io audiva de un femina (non parlante a me, ma io la audiva), que ab hodie on deberea observar le temperie durante 12 dies, proque qual temperie il habeva hodie, tal habera januario; qual il habera deman, tal habera februario, etc. Io non sape, esque illa ha ration, ma si io face notitias super le temperie, il se verificara. (Pro facer vos calme, io non publicara mi notitias hic... :-) ). P. ex. hodie il habeva nebulose, coperite e frigide (ma le temperatura non attingeva le puncto de congelation; illo era circa + 2 °C in le matino). Il non era specialmente ventose, le ventetto, que forsan appareva poteva ser frigide, naturalmente. Isto es toto, io crede, que io pote reportar super le temperie de hodie...

2 comments:

N said...

Interessante. Anque in Norvegia on observava le tempore inter Sancte Lucia e Natal e faceva le prognosis del nove anno. Hodie nos ha 11 grados (ci, non lontan del polo arctic). Ancora tres o quatro dies con le mesme temperatura, e nos pote concluder que le hiberno va esser supportabile ...!

Petro Ferrero de Hungaria said...

Naturalmente on non debe perciper iste cosa como ver per un certitude de 100 % (cento pro centos), proque io observava e notava le temperie de iste 12 (dece duo) dies e si io los credeva totalmente, alora io deberea concluder, que tote le anno 2007 (duo milles septe) essera nebulose, sin sol - e io non vole creder isto (e naturalmente isto es impossibile).

Naturalmente - io crede - non tote le tracias del temperie debe esser observate durante iste dies, proque non totes es applicabile al menses: p. ex. si in le tertie die le temperatura es -2 °C, isto non significa, que in tote le martio le temperatura essera sub zero. Ma forsan isto predice tendencias, nam tal observationes folkloristic se crea durante centos de annos o plus, dunque illos debe haber alicun base de veritate.