Il es le 11 (dece-un, undece) de novembre, le die commemorative de (Sancte) Martino, qui nasceva sur le territorio del hodierne urbe hungare Szombathely, le urbe trovabile minus que 60 (sexanta) kilometros de mi urbe Zalaegerszeg, ubi io nasceva e habita. Szombathely in Hungaria alora ha essite nominate como Savaria in Pannonia.
Io non sape, si isto es ver o es un legenda, ma (Sancte) Martino, quando videva, que un homine povre habeva frigido, ille divideva su mantello in duo partes e un parte ille dava al homine povre.
In Hungaria on non particularmente mangia castanias durante le jorno de (St.) Martino, como in altere paises, ma traditionalmente il es usual mangiar ansere in iste die. Iste tradition ha le origine, que secundo le legenda quando on voleva eliger Martino a esser episcopo, ille se celava in le clausura pro anseres in le corte de alicun casa proque ille non voleva esser episcopo, ma le critar del anseres le revelava, assi ille totevia ha essite retrovate e essite eligite como episcopo.
In le folklore hungare on dice: si alicuno non mangia ansere durante le die de (Sancte) Martino, ille/illa va haber fame durante tote le anno... Io spera, que isto non se realisara a me, proque hodie io non ha le intention de mangiar ansere, ma lo faceva le sabbato durante un vespere con musica, que nos faceva in un restaurante del provincia. A saper: recentemente, quando le die de (Szent) Márton non cade al fin del septimana, ma a un die de labor, alora le hungaros organisa vesperes in restaurantes con iste repastos, o evenimentos durante le jorno con iste thematica in alicun die de weekend precedente le ver die de (Sancte) Martino.
Del resto il appare devenir plus frequente in Hungaria, que parentes da nomine Martin a lor filios in vice del forma hungare Márton. Isto non veni del honor verso le “sancto” secundo me, proque alora illes darea le nomine hungare Márton, ma del influentia plus e plus grande del West. Forsan Martin refere a alicun famose actor del films de Hollywood…?
