Mi lectores fidel forsan ancora memora, que in connexion del alphatebo runic de nordicos io scribeva articulos hic super le original alphabeto de hungaros, como isto:
http://zalaegerszeg.blogspot.com/2006/03/le-alphabeto-runic-hungare.html
Desde alora io discoperiva, que un boteca in Zalaegerszeg applica iste alphabeto, dunque lo usa in practica, assi iste alphabeto vermente vive in function!
E pois que io ha comprate un apparato de photographar, ora io ja poteva photographar le fronte del boteca:
Il es interessante vider le hereditage latin in Hungaria (in le nomine del boteca) e le coexistentia del traditiones ancian hungare, in le scripto per runas.
Le texto se lege como "kincses bolt" - per le alphabeto latin del hungaro - e significa: "boteca con tresores".
2 comments:
Multo laudabile. Esque hungaros moderne generalmente comprende le message, o esque illos recognosce le scriptura sin comprender le contento? (Norvegianos generalmente non pote leger un texto scribite per le runas nordic ...)
Esque tu ha un profilo al Libro del Facies (Facebook)? Le interlinguistas es in le processo de prender controllo de iste ancian communitate de origine american. Le majoritate del discussiones es ducite in interlingua - o, al minus, io vide le comenciamento de un tendentia. Io te cercava, ma trovava plure Peter Kovacs-es (includite un footballista norvegian con le mesme nomine), ma non sape qui es tu. :-) Ecce mi profilo.
Car Martein,
No, le majoritate del hungaros non pote leger le runas e non mesmo sape, non recognosce, que illos es runas - regrettabilemente. Durante le communismo e le tempore sub le Habsburges il era assecurate, que le hungaros oblida si multe como possibile lor ancian historia e characteristicas national, etc. Ma hungaros "patriotic" generalmente sape, que son le runas e illes "le plus nationalista" mesmo pote - in differente grados - leger o "scriber" los.
Io volerea adjunger me a un rete social international (usque ora io es membro de Orkut, ma on assere, que illo non es assatis active, etc. e membros de retes social hungare), ma io non sape, qual es le plus international, le plus usate e le plus popular internationalmente. Si Facebook, alora io va crear mi profilo in illo. Le sol rete international, cuje membro io es, es Ipernity, ma illo es occupate per esperantistas e io ha contactos quasi exclusivemente con esperantistas ibi. Si le interlingua-istas intende occupar Facebook al mesme maniera, como esperantistas lo faceva con Ipernity, alora isto es bon. Ma scribe me, qual es le plus international, plus popular rete social! Al qual il esserea rational adjunger me?
Post a Comment