Schisma moderne al catholicos

In le ecclesia catholic roman, le stato de schisma ha occurrite officialmente post que le Fraternitate de Sancte Pio le Xme consecrava quatro nove episcopos le 1 de julio in Ecône, Switza, malgrado le prohibition expresse del Papa Leo le XIVte. Le reaction del Vaticano era extrememente resolute.
Le Dicasterio pro le Doctrina promulgava le excommunication automatic del personas implicate a pena 24 horas post le evento. Secundo le decision, sex episcopos, includente le duo consecrantes e le quatro novemente consecrate era excludite del communion ecclesial. Le Papa Leo le XIVte comparava le schisma al laceration del tunica non-sute de Christo, e sublineava que le consecration sin approbation papal es un grave peccato contra le unitate del ecclesia, lo que include anque le rejection del primatia papal. Le direction del fraternitate justificava le acto affirmante que, como consequentia del reformas post le 2nde concilio vatican, un stato de necessitate emergeva in le ecclesia, e que le nove episcopos era necessari pro preservar le hereditage sacrate del tradition.
Secundo lor argumento, illes non funda un ecclesia rival, ma defende le integritate original del fide contra le cambios moderne, e illes declarava previemente que illes considera invalide tote le sanctiones vatican imponite contra illes. Totevia, le decreto vatican pone anque le fideles ante un election seriose, nam illo stipula: les qui se adhere formalmente al fraternitate debe anque esser considerate excommunicate, e que le confessiones e maritages celebrate per le clero del fraternitate es invalide.
Iste disposition affice dece milles de fideles in tote le mundo; solmente in le Statos Unite, illo pote influentiar directemente le vita religiose de circa 30.000 personas.

Companias del Intelligentia Artifical annihila libros de papiro?

Companias de IA compra libros antique, ingere lor contentos pro instruer modellos, e postea los destrue a un scala incredibile, mesmo si quasi nulle copia remane

Frank Landymore, futurism.com

Traditionalmente libros ha essite bon pro duo cosas: leger e parer belle sur le plancas.
Ma le companias de Intelligentia Artificial es interessate in nulle del duo.
Pro les qui construe grande modellos de linguage le libros es nihil plus que farragine pro esser devorate in massa ante de esser expellite como spinas de pisce. Frequentemente illes es felice de usar libros digital, o melior ancora: libros digital pirate, como Meta ha essite accusate de facer, e como Anthropic era obligate pagar un saldo de 1,5 milliardos de dollares a autores pro haber facite lo mesme.
Ma multe companias, incluse Anthropic ha comenciate ingerer libros physic in loco de digitales, del quales illes pote emer innumerabile copias usate a bon mercato. Secundo le processo resolvite, Anthropic usava un machina de talio hydraulic pro remover nettemente le paginas del libros que illo obteneva de revenditores de libros e postea los scannava usante apparatos de imagine de grado industrial. In altere parolas, illo litteralmente rumpeva le libros del autores pro maestrar su IA.
Iste processo tirava avantage de un concepto legal, cognoscite como le doctrina del prime vendita. Illo permitte a un emptor facer lo que ille vole con un emption sin le permission del original possessor del derecto autorial. E post que Anthropic transformava le textos physic original in los digital — in loco de redistribuer los como nove copias — un judice trovava que isto esseva "transformative", e per consequente protegite per le uso juste (“fair use”).
Ora, como reporta 404 Media iste practica ha devenite satis prevalente que mesmo venditores de libros ben establite cerca profitar del boom del IA. Un base de datos appellate ISBNdb que se vanta de haber le "plus grande base de datos de libros del mundo", exalta que le "melior datos del mundo pro inseniar le IA se trova sur un planca", defendente iste textos physic como non corrupte per le mediocre scriptura de IA que ja ha polluite tanto del Internet (e de facto, del libros plus nove).
"Libros imprimite del era pre-LLM son structuralmente garantite de esser libere de iste contamination. Solo isto es un avantage significante, illo explica in un articulo sur su sito web, citate per 404. "Libros physic publicate ante iste data (2022) son structuralmente munde de instrumentos moderne de intoxication."
Olim concentrate in adjutar bibliothecas, distributores, e librerias a trovar e vender libros, ISBNdb ora adjuta companias de IA emer in massa inter 1.000 e un million de libros per commanda, secundo 404.
Como un bonus addite, illo alsi promitte al companias de IA que illo mantenera lor emptiones secrete — necuno vole finir sub le lumine de reflectores como Anthropic e Meta, obviemente — ben que illo sona clarmente conscie de quanto incredibilemente dubitose iste practica pare.
"Le problema optic es real," dice le sito de ISBNdb. "'Compania de IA destrue duo milliones de libros' non es un titulo que genera sympathia."
Un parve venditor de libros diceva que in april ille passava subitemente vender non plus de 20 libros per septimana, ma centos, e ille es quasi certe que le clientes es laboratorios de IA, notante le selection aleatori del libros e le facto que totes ha ISBNs. Ille addeva que su inventario es plen de libros rar e exhaurite, lo que significa que un compania de IA pote destruer alicunes del poc copias remanente que pote esser trovate.
"Io personalmente ha sentimentos mixte sur tote isto," le librero diceva a 404. "Isto me beneficia financiarimente e tamben per vacuar le ancian inventario que alteremente probabilemente non se venderea. Io ha essite ben preparate pro iste venditas con inventario del estraniero e libros in linguas estranier. Del altere latere, io non ama le uso final, e io non ama que libros rar es reducite a pulpa."
Plus libros antique pote esser in periculo. 404 notava como venditores de libros rar in le Pais Basse es inundate con compras in massa que illes crede es facite per companias de IA, ben que illes non pote saper lo con certitude.
Suspiciones simile son sentite in tote le industria. Servicios como ISBNdb facilita iste commandas in massa, mantenente le emptores de IA anonyme como promittite. Il pote haber forte indicios que un commanda in massa es pro un laboratorio de IA, sed le libreros pote, pro le major parte, mermente specular.

Aurora varadiense: le autoritates romanian rumpe le muro de un convento monumental in Oradea-Nagyvárad

A cinque horas in le matino del 27me de maio 2026 occurreva in le citate west-romanian Oradea/Nagyvárad, vicin al frontiera hungare-ruman, que le autoritates del poter romanian – le executor e le responsabile municipal del eviction - rumpeva inexpectatemente le muro de plure seculos de etate, faciente un brecha in le edificio monumental del convento del prepositura premonstratense. Illes penetrava per fortia, postea illes injungeva le abbate a evacuar le locales, illes comenciava le eviction del abbate Anzelm, i. e. FEJES Rudolf.

Le autoritates municipal romanian dubita le continuitate juridic quasi millenari del communitate catholic-premonstratense hungarophone per medios administrative e judicial. Secundo le organisation create pro le defensa del convento le eventos viola gravemente le libertate religiose, le autonomia ecclesiastic e le derectos del proprietate. Le confiscation del ecclesia viola equalmente le lege romanian e le derectos del UE.

"Le presentia del ordine premonstratense in Nagyvárad/Oradea i a plus que novem seculos retro. Le abbatia non es solmente un centro religiose, ma plena tamben un rolo de fundar scholas e organisar communitates, e forma un parte integrante del patrimonio cultural hungare. Il es inacceptabile que on tenta render un institution de tal importantia impossibile per un processo de execution, un intimation de octo dies e un eviction planate con le fortia del gendarmeria" – dice un communicato.

Le situation actual

Le ecclesia iconic del gente hungarophone varadiense ha 300 annos de etate, ma ora on non mesmo pote tener missas in illo adequatemente, proque mesmo le sacristia ha essite occupate e claudite per serratura pendente, isolante lo del resto del ecclesia, assi il non plus ha electricitate, aqua, ni lavatorio. Il non es irrelevante que per isto le practicar del religion ha essite facite plus difficile in lingua hungare, dum in parve villages hungare de Transsilvania, reformate o catholic le rumanos construe enorme ecclesias orthodoxe con cupolas in forma de bulbos, ubi le numero de rumanos e assi le proportion de fideles orthodoxe es basse.

A causa del constructiones in curso in le loco, on time que le ecclesia del seculo XVIII poterea collaber. Previemente un schola hungare functionava juxta le ecclesia, le qual era expropriate plus antea e es nominate actualmente como “Collegio National Mihai Eminescu”. In le vicinitate le municipalitate ha construite ja un garage subterranee, e ora illes vole expropriar le ecclesia a transverso del sacristia. Le objectivo es le evacuation del edificio. Le municipalitate de Oradea/Nagyvárad vole expropriar le ecclesia con pretexto a “renovation”, totevia isto es contradicite per le facto que recentemente illes rumpeva mesme le muro del convento.

Le negotio immobiliari comenciava ja in le tempore quando le actual prime ministro (interimari) romanian Ilie Bolojan era burgomaestro de Nagyvárad/Oradea. Su recente position como prime ministro poterea explicar le silentio e le passivitate del representantes de interesses minoritari hungare in Romania e los del governamentos de Hungaria in iste caso. Inter le prominentes hungare de Romania solmente TŐKÉS László (74), episcopo reformate de Transsilvania defende (como persona private) le abbate catholic. Como analogia, in 1989 le revolution romanian in Temesvár/Timișoara e le subversion del dictatura de Ceaușescu comenciava justo equalmente per su proprie caso de eviction, post le qual Tőkés deveniva un figura iconic del revolution democratic romanian.

In le resistentia de massa e catena human de april e maio, de Hungaria solmente TOROCZKAI László, le presidente del partito radical-national Mi Hazánk, e plus tarde alsi alicun membros del partito e le representante del partito del Parlamento Europee BORVENDÉG Zsuzsanna era presente. Iste ultime portava le question del eviction de abbate Anzelm al nivello mesmo international in su intervention in le Parlamento Europee.

Antecedentes directe

Initialmente le eviction de Rudolf Fejes – abbate Anzelm – era fixate per fortia del gendarmeria pro le 23 de februario 2026, lo que on totevia succedeva impedir, proque centos de personas se alineava ante le ecclesia pro defender le patre.

Postea le 14 de april, ante le novem del matino – in le momento le plus "sacre" del "sancte" missa, precisemente durante le "sancte" communion – le gendarmes ruman intrudeva scandalosemente con armas e sin base legal a in le Ecclesia del Matre Dolorose de Oradea/Nagyvárad, un del ultime bastiones hungare del citate. Ben que illes se retirava ancora alora, post le fin del missa illes faceva un nove tentativa: rumpente le porta del latere del sacristia illes tentava entrar de detra. Iste attacco era initialmente repellite con successo per le abbate e le fideles presente, formante un catena human, sed finalmente le fortia public e le executor succedeva penetrar in le sacristia e in le edificio ligate al ecclesia, assi le ardente disputa juridic continuava intra le edificio. Ille die le convento e le residentia prelatal ha essite occupate, e on prendeva per fortia un inventario del vestimentos liturgic (casulas) e del calice, del mobiles, etc., in le sacristia, le quales non mesmo es proprietate del stato, sinon del ecclesia.

Ma gratias al resistentia personal e physic del fideles, in plus de TŐKÉS László e de TOROCZKAI László, le sacrificio demonstrate durante le vexation de quasi octo horas non era in van: on succedeva obtener al minus que le monacho hungare non debeva abandonar le convento immediatemente, ma recipeva un moratorio de trenta dies.

Post que iste periodo se ha expirate, le 14 de maio 2026, a causa del presentia repetite e del resistentia del fideles hungare de Nagyvárad/Oradea e de Tőkés e Toroczkai le executores non osava venir; totevia illes osava in le aurora del 27 de maio, quando illes rumpeva le muro del convento.

Que duceva a isto?

Le complexo de edificios de Oradea/Nagyvárad pertineva originalmente completemente al ordine catholic premonstratense; le ordine monastic pertine al Prepositura Premonstratense de Váradhegyfok/Promontorio, que durante 900 annos ha exercite activitates spiritual e educative in ille region de (alora) Hungaria.

Totevia, como consequentia del dictato de pace in Trianon, post 1920 Nagyvárad/Oradea era annexate a Romania. In le annos 1930 occurreva transformationes in le registro de proprietate e in le derectos de possession del parte del autoritates ruman que le ordine premonstratense considera hodie illegal. In ille tempore on essayava transferer le ancian proprietates ecclesiastic de plus in plus al dominio del stato ruman, cessante le derecto de proprietate exclusive del prepositura premonstratense.

In 1940, Transsilvania del Nord, e con illo Nagyvárad (Oradea) retornava a Hungaria. Alora le stato de proprietate anterior era restablite sur le base del legislation hungare, e le ordine era registrate de novo como proprietario del complexo de edificios. Le ordine se refere hodie a iste continuitate juridic.

Ma Oradea (Nagyvárad) de novo ha essite annexate a Romania in 1947, post le occupation militari sovietic-ruman de 1944. Post que le communismo deveniva le systema de poter del stato, in Romania le proprietates e ecclesias era completemente secularisate in 1948, lo que ni le ordine premonstratense hungarophone, ni le actual autoritate ruman recognosce como juridicamente continue o valide.

Nonobstante que post 1989 le restitution del benes ecclesiastic comenciava in Romania, le processo avantia extrememente lentemente e, in multe casos es complicate per processos judicial e de execution, como in iste caso specific.

****************************************************************************

Ecce, vos poteva leger le historia. 

 

Le rumanos post lor regno continue de 1944 in iste region west-romanian impone sempre plus lor "cultura" balkanic in vice del cultura centro-europee preexistente in le citate [ia] Varadino* e su ambiente.

On pote spectar le video super le evenimento, quando le gendarmes ruman discute con le abbate e altere representantes durante que le muro es ja rumpite. Alicun interlinguistas ama cercar simile o quasi identic parolas de interlingua e le rumano e testar alteres, in qual grado illes comprende le rumano secundo interlingua. Ora io adde ironicamente: vamos, que vos ascolta: ora io comprende de iste video p. ex. [ro] “autoritățile locale” = [ia] “le autoritates local”, etc. Superbe, nonne?

Alicun interlingua-istas non comprende e demanda de tempore a tempore, proque le rumano non es includite a in le linguas-fontes o de controlo de interlingua... Esque vermente isto es le plus importante question del "communitate" interlinguista durante que un tal scandalo occurreva in Romania?! Vergonia a vos!

 

*Le fontes historic describe Nagyvárad/Oradea con le nomine latin Varadinus, de isto directemente pote venir un forma Varadino in interlingua, que es appoiate per le nomine italian del citate Gran Varadino. Anque secundo le fontes latin varadiensis io creava le adjectivo "varadiense" in interlingua, i. e. "de Várad". Anque in le nomine Promontorio de Váradhegyfok io considerava le historic forma latin Promontorium, del qual veniva le forma ruman Promontoriu, assi Promontorio in interlingua.

Corvos va mundar nostre stratas?

Le startup svedese nominate “Corvid Cleaning”, cuje fundator es Christian Günther-Hanssen utilisa le intelligentia e le capacitate de apprender del corvidos pro meliorar le munditia public. Le base del methodo es le “conditionamento operante”: le aves apprende que si illos pone un puncto de cigarretta jectate via o parve immunditias in un machina automatic special, illos recipe in cambio immediatemente un “recompensa” (pro exemplo un nuce. Le machina es equipate con un sensor que recognosce le residuos introducite e distribue le mangiar automaticamente.) Le corvidos es capace de recognoscer le relationes de causa e effecto e le patronos pro obtener le recompensa.

 

Le initiativa non es actualmente un systema introducite a nivello national, ma un ”projecto pilota” que era presentate como forma experimental in le urbe svedese Södertälje. Le objectivo primari del projecto es le demonstration e le testage del technologia in un ambiente urban.

Esque tu controla plure vices si tu claudeva vermente le porta?

Quando alcuno ha ja partite de casa, e postea subitemente retorna pro vider si ille ha vermente claudite le porta, multe personas pensa immediatemente que se tracta de un persona excessivemente anxie o distracte. Totevia, le psychologia approcha iste phenomeno de un maniera multo plus nuanciate. Post le verification repetite, de facto, se trova modos de functionamento human multo fundamental – e solmente in certe casos illo pote indicar un ver problema psychic.

 

Le functionamento del cerebro que cerca securitate

Un del cargas le plus importante del cerebro human es recognoscer e evitar le periculos. Iste mechanismo functiona in nos: le cerebro verifica continuemente si toto es secur in nostre ambiente.

Si, per exemplo, on sorti trans le porta, le cerebro face rapidemente un "inventario": si on ha extinguite le estufa, si on ha claudite le aqua, si on ha serrate le porta. Un breve verification in tal momentos es un reaction completemente natural. Tal comportamento es simplemente un modo de reducer le incertitude.

Secundo le psychologos, iste typo de verification es de facto le systema de securitate del cerebro, lo que adjuta prevenir le problemas.

 

Quando le verification deveni un ritual reassecurante

Totevia, il occurre que le tranquillitate non dura multo. Le persona ha ja partite, ma le pensamento surge de novo: "Esque io ha claudite le porta con securitate?" In tal caso, ille retorna, verifica, e le anxietate diminue immediatemente.

Iste phenomeno es cognoscite in psychologia como “reinfortiamento negative”. Post le verification, le tension dispare, dunque le cerebro "apprende" que iste comportamento es un modo efficace de reducer le anxietate. Assi, le proxime vice, illo selige de novo le mesme solution.

Si isto occurre solmente occasionalmente, il non ha motivo de preoccupation. Illo occurre a multe personas, specialmente in periodos de stress o fatiga.

 

Le contexto del verification compulsive

Le situation deveni plus complexe quando le verification deveni repetitive, de un character quasi ritual. Il occurre que alcuno non examina le porta un o duo vices, ma cinque o dece vices. Le psychologia nomina isto comportamento de verification compulsive.

In tal caso, frequentemente appare le si-nominate pensamentos obsessive. Istos es pensamentos o timores recurrente – per exemplo, le timor que un furto occurre – que provoca anxietate. Le verification deveni alora un acto compulsive: un comportamento que temporarimente diminue le tension interne.

Iste patrono es un del symptomas le plus cognoscite del si-nominate disordine obsessive-compulsive (OCD). Ma il es importante accentuar: le verification occasional in se mesme non significa que alcuno vive con tal disordine.

 

Le rolo del senso de responsabilitate excessive

Secundo le recercas, post le verification compulsive frequentemente se trova un patrono de pensamento specific. Le persona concernite senti sovente un responsabilitate excessive pro le periculos possibile. Ille pensa que si ille non verifica le situation con bastante precision, alcun grave consequentia poterea occurrer – e pro isto ille serea responsabile.

Iste modo de pensar intensifica le incertitude fortemente. Le verification assi non deveni un simple habitude, ma un typo de un ritual de securitate.

 

Quando tote isto pote esser ancora considerate normal?

Secundo le psychologos, il vale le pena distinguer inter le prudentia quotidian e le comportamento compulsive. Le majoritate del personas reguarda a vices le porta, o controla le cocina ante de partir. Isto es completemente natural.

Le expertos parla generalmente de un problema si le verification:

- se repete multo frequentemente,

- prende un tempore significante,

- causa forte anxietate,

- o impedi le vita quotidian.

In tal caso, il vale le pena consultar un specialista, proque le tractamento psychologic adequate – per exemplo, le therapia cognitive-comportamental – pote adjutar multo.

 

Le rolo del cerebro in le fundo

Le recercas del neuroscientia indica que in le developpamento de comportamentos compulsive, le functionamento de certe retes cerebral pote anque jocar un rolo. Specialmente le activitate del areas responsabile pro le prisa de decisiones e le detection de errores – pro exemplo, le cortice prefrontal – pote esser differente in le personas concernite.

In plus, le functionamento del neurotransmissor nominate serotonina pote anque esser ligate al symptomas compulsive, dunque in certe casos un tractamento medicamentose pote anque esser considerate.

 

Proque precisemente le porta es le objecto de verification le plus commun?

Curiosemente, in differente culturas del mundo, le mesme cosas appare le plus frequentemente in le comportamento del verification: le porta, le serratura, le cocina o le valvula de gas. Tote istos es ligate a situationes que pote representar un periculo real si nos non los gere correctemente.

Le cerebro es dunque particularmente sensibile a iste riscos, e activa plus facilemente le "verification de securitate".

 

Summario

Si vos retorna a vices pro verificar si vos ha claudite le porta, isto es un comportamento completemente natural. Le cerebro simplemente essaya reducer le incertitude e assecurar le securitate.

Si totevia le verification deveni repetitive, de character compulsive, e causa un anxietate significante, alora un processo psychologic plus profunde – pro exemplo, le maladia obsessive-compulsive – poterea esser in le fundo. In tal caso un specialista pote adjutar restablir le equilibrio interne.

Autor: “PTA”, i. e. “Palmi Renáta”. Fonte: Egészségkalauz.hu

Le miraculo del lingua hungare

 

kirúg = ille dimitte

kirúgja = ille le dimitte

kirúgta = ille le dimitteva

kirúgatta = ille faceva alicuno dimitter le

kirúgattatta = ille ingagiava alicuno a facer alicuno altere dimitter le

kirúgattattatta = ille motivava alicuno a ingagiar alicuno altere a fin de facer alicuno tertie dimitter le

 

Que es isto? Un catena de morphemas (radices de parolas con elementos construente parolas) hungare e le traductiones o plus tosto: explicationes interlingual.

A saper: le hungaro es un lingua agglutinante, dunque in vice de prepositiones le modification del significatos del radices (parolas-nucleos) intacte occurre per affixos como suffixos, prefixos, etc.

Ecce un exemplo amusante, que multe affaires pote esser exprimite per postfixos in le hungaro addite al verbo ‘kirúg’ (que es plus tosto colloquial, non appare in papiros official) in le procession de 

[en] to fire [de] kündigen, entlassen.

In le dictionarios de interlingua io trovava equivalentes como

dimitter / congedar / dar congedo / dar foras de un posto / dar ordine de retirar se / licentiar. 

Io adde mi proprie constructiones logic, derivate de altere parolas de interlingua: 

‘disoccupar’ e ‘disemplear’, 

ma forsan nulle parolas de istos ha le nuance de slang, que le version hungare ‘kirúg’ appare representar. 

(‘Kirúg’ esserea in le stilo official ‘elbocsát’, que ha le mesme nuance como “dimitter”, “congedar”.) 

In le hungaro a causa de iste systema agglutinante non mesmo le pronomines personal e le subjecto debe esser mentionate, proque le formas agglutinate del parolas indica tote istos.

Kirúg = Ille/illa dimitte (congeda, licentia)

 – ci le subjecto e le objecto non es mentionate, proque del forma del verbo il es evidente, que le action es facite per alicuno in singular, tertie persona. Le objecto grammatic anque non es mentionate, proque in iste conjugation appellate “intransitive” le objecto non es importante, non es accentuate. 

In comparation in le conjugation transitive le desinentia ja indica, que le action es dirigite verso un certe persona:

kirúgja = ille le congeda.

Si nos prende le forma passate in relation transitive, le forma es “kirúgta” = ille/illa le/la dimitteva.

Mesmo si nos adde le causativo, le resultato essera:

kirúgatta = ille le faceva dimitter le, illa la faceva dimitter la, etc.

Post adder iste postfixo - at - indicante le causativo sempre al construction previe le resultato essera constructiones pronunciate assatis rhythmic – ma tote illos ha senso.

Forsan le quarte caso - kirúgattattatta = ille motivava alicuno a ingagiar alicuno altere a fin de facer alicuno tertie dimitter le - non appare in le parlar quotidian hungare, si non explicationes simile, como in le traductiones (explicationes) interlingual, ma su possibilitate theoretic existe secundo le functionamento del lingua.

Io debe adder tamben, que le “traductiones” interlingual son solo approximative, ma a causa del systema linguistic de esperanto inclinate al agglutination le traductiones in esperanto son plus simple e plus comprensibile e illos coincide plus con lo que le versiones original hungare exprime:

kirúgta: li maldungis lin

kirúgatta: li maldungigis lin

kirúgattatta: li maldungigigis lin.

 

Totevia le parola-nucleo dung- non es assatis international in se. Les pote comprender lo qui ha apprendite le significato de iste parola intra esperanto. Illo veni del german dungen, ma illo es archaic mesmo in le germano mesme, probabilemente nemo lo usa in vice de beschäftigen e altere parolas. 

De novo cosmonauta hungare in le spatio

 

 

Iste creation photographic augura le tempore, quando cosmonautas hungare coce gulash sur un planeta estranie... :-D

Tibor KAPU es le 2nde cosmonauta de Hungaria. Le 1me es Bertalan FARKAS, qui sojornava in le spatio in 1980. Kapu participava justo recentemente in un mission spatial international. Ille deveniva lanceate le 25 de junio 2025, se connecteva al Station Spatial International le sequente die e retornava sur le Terra le 15 de julio 2025. (Le capsula cadeva a in le Oceano Pacific, proxime a San Diego.)

Le mission es considerate un successo, su equipa passava 18 dies in orbita, habente exequite plus de 60 experimentos scientific. Durante su mission Kapu exequeva experimentos scientific e biologic in gravitate basse, se focalisante sur technologias innovative, medicina spatial, e observationes ambiental. Su contribution fortifica le position de Hungaria in le campo del exploration spatial e inspira nove generationes de scientistas e ingenieros in su patria.