Desiros e decisiones

 

Alicuno diceva o scribeva, nonobstante que le elementos basic e le materias necessari pro construer le phonographo o grammophono stava a disposition in Europa ja durante le era baroc, nemo los inventava in ille tempore, proque le idea de experimentar con le registration de sono non mesmo appareva in le mentes del gente. Pro illes, le musica significava sempre musica in vivo, le experientia de concertos in vivo, festas de ballo, etc. Illes non desirava reascoltar musica repetitivemente que occurreva in le passato, sempre de maniera identic. Io meditava, si omnes era felice con le transportation per cavallo e non desiderava solutiones plus rapide e de plus longe distantia in minus tempore, e pro isto nemo inventava vehiculos propulsate per vapor (e eventualmente electricitate, etc.) anteriormente? Ah, non - io rejectava le idea - proque multe culturas habeva le cultos de respectar aves, considera solmente le culto turul del hungaros o le vestimentos de plumas del americanos native, assi le desiro pro rapiditate e longe distantias in minus tempore poteva exister. Totevia io crede que in le era pre-industrial, le gente era satisfacite con le possibilitate del transportation per cavallo, assi omnes viveva lor vitas in areas plus micre e non habeva le desiro de viagiar longe- e rapidemente. Le desiro pro isto poteva levar se solmente in alicun scientistas e inventores experimentalista, e le majoritate non pensava a certe possibilitates del progresso - si tu vole, “evolution”. Anque io non ha le desiro pro autos autonome, ma on los totevia developpa. Io anque non haberea le desiro pro autos que functiona con benzina o diesel, ma alicunos decideva isto multo tempore retro, sin consultar le opinion de me o de mi ancestres. “Isto es toto – e puncto! Isto es lo que tu recipe si tu vole arrivar rapidemente a un loco distante.” Ma - io non es experto in isto, io solmente suppone - pro usar energia electric, non es necessari excavar petroleo, etc., ma on face isto totevia pro operar le autos. Forsan proque isto servi le interesses de alicunos? Si, nos pote esser gratiose a illes (illes poterea referer a isto), proque illes crea empleos pro multe personas, illes mantene le mineria como industria. Illes poterea haber decidite non producer e vender ampullas que se funde post un certe tempore, o calceas cuje filos accurre post un certe tempore, calcettas que se perfora, etc., ma alora haberea minus negotios e locos pro empleos. Ora nos ha le intelligentia artificial: le positiones de interpretes, traductores, artistas graphic, etc. es ja in periculo io opina, si nos non es caute e non integra le IA a in le labor human, si nos non lo pone a nostre latere como adjuta, ma lo developpa pro esser plus autonome. Si nos lo developpa pro non haber necessitate de labor human, locos de labor disparera, e postea de ubi habera nos moneta pro comprar lo que nos necessita pro superviver? O io ha arrivate troppo distante del thema del registration phonographic?