Le ministro del Papa parlava contra un templo hungare transformate a un night-club

Le ecclesias non visitate per le credentes pote esser vendite o ruinate, ma non transformate a night-clubs – informava le jovedi cardinal Gianfranco Ravasi, ministro cultural del Vaticano. Le presidente del Consilio Pontifical del Cultura livrava un templo de Hungaria como un exemplo negative, que – secundo su reporto “era transformate a un night-club e sur le altar striptease ha essite presentate”.

In Citate Vaticano le cardinal, qui informava jornalistas recognosceva, que le mantenentia de alicun ecclesias poterea costar troppo multo pro le dioceses, totevia ille avisava le potentes decidente super le futuro del previe sanctuarios a “le plus grande circumspection”.

Anque in Europa del West on transforma constructiones ecclesiastic non plus usate pro scopos religiose a casas de amusamento con predilection. Pro ex. in Hollanda occurre, que on organisa bazares in alicun cathedrales major e in un enorme templo de Dublin, le capital de Irlanda functiona un night-club e taverna sub le nomine “Church Bar”.

Traduction del hungaro: Péter Kovács. Fonte: origo.hu

Radio Interlingua 015: le 2nde interview "kibonese" con le homine, qui "vole accender le foco mundial"...

Car lectores, car ascoltatores de mi Radio Interlingua!

Io publica ora le bon nova a vos, que le 15te (dece-quinte) podcast de Radio Interlingua ha essite publicate a www.interlingua.com. Illo es intendite pro octobre 2009 (duo milles novem) e illo ha essite publicate de facto in octobre - vermente in le ultime minuta de octobre...

Illo contine le secunde interview facite in Kirchheimbolanden, al fin del conferentia international de interlingua iste estate con le homine, qui - como ille dice in le interview - "vole accender le foco mundial" de interlingua. Ille es Sven Frank, secretario general de UMI, organisator del conferentia in Kibo e - desde le interview ja - tamben le presidente de UGI - le Union German pro Interlingua.

In iste interview al ultime vespere del conferentia nos summarisa, que se realisava e como del planos que vos poteva audir in le prime interview, facite al initio del conferentia. Ultra isto Sven Frank detalia su planos, respectivemente los de UMI pro le futuro.

Bon passatempore pro vos con Radio Interlingua, que parla in interlingua: le lingua ideal pro podcasts international! :-)

Get this widget | Track details | eSnips Social DNA

Hungaria Grande vive - al minus in le mente del locales...

Lo que Herta Müller era eligite como premiato Nobel in litteratura iste anno me recorda un caso recente de nos in Germania.

Un gruppo musical folkloristic de mi urbe, in le qual io sona visitava le mercato agricultural del ambiente Kusel (Rhenania-Palatinato, Germania), le qual urbe es partenario de mi urbe Zalaegerszeg. Nos musicava la sub le aere libere e multe passantes nos audiva. Un dama prendeva le contacto con nos, dicente, que illa veni de Temeswar / Temeschwar / Temeschburg (pro mentionar le versiones german del citate Temesvár in hungaro, in rumano Timişoara), que es in le region Banat de Romania, un region al frontiera actual hungaro-ruman. Naturalmente olim Temesvár pertineva a Hungaria.

Illa recognosceva musica simile a lo de su patria e demandava, unde nos veni. Nos diceva: de Hungaria, durante que nos sonava musica de Transsilvania, que poteva sonar a illa familiar. Transsilvania es un "region" vicin a "Banat", ma non es identic con illo, ben que ambes pertineva olim a Hungaria e ambes pertine ora al stato de Romania; pro isto multe hungaros non-informate crede, que anque le ambiente de Temesvár / Arad / Nagyvárad (Oradea in rumano) pertine a Transsilvania. Illa anque rejecteva isto, dicente: "No, io non es de Transsilvania, io es de Banat!" e semblamente illa era multo fer a lo que nos sona un musica vicin a su region de origine. Mesmo illa nos demandava sonar qualcosa de Banat, ma le musica hungare non differe characteristicamente del regiones vicin hungare a Banat e nos non cognosce musica german (suabe) de Banat.

Intertanto arrivava su amicos, le quales illa informava fermente, que "iste
musicos veni de mi patria"... "Ups" - como le germanos dice; illa diceva "de mi patria", malgrado que illa sape, que Banat ora pertine a Romania e non plus a Hungaria, unde nos musicos veniva. Ecce, Hungaria Grande ancora vive - o al minus su memoria in le maniera de pensamento del locales!

Illa es un suaba - un germana - de Banat; multe germanos de ibi cambiava domicilio a Germania ante, durante e in le major parte post le liberation de Romania del dictatura de Ceauşescu. Un tal germana es tamben Herta Müller, qui mesmo parla o parlava in hungaro, veniente de un region ubi hungaros, germanos e rumanos vive o viveva insimul. Un altere famose germano nascite in Banat es le actor de Tarzan, Johnny Weissmuller, nascite como Johann Peter Weißmüller, tamben in Temesvár.

"Si tu non es in Youtube, tu es nemo."

- scribeva Gheorghe Petrineanu in su commento a alicun emission de Radio Interlingua. Ille me incoragiava publicar Radio Interlingua tamben in Youtube, que es le plus popular spatio pro distribuer videos in le internet (malgrado, que le videos de Google son plus evolvite, con le possibilitate de subtitulos e sin restrictiones del longores del videos a poner. E on pote liberemente discargar le files a su proprie computator, etc.) Assi on poterea informar uno super interlingua plus effectivemente, proque Youtube attinge un publico plus large. Naturalmente anque io mesme habeva iste idea previemente, ma como effecto de su commentario io ha publicate le prime emission como experimento - isto era possibile in duo partes, a causa del restrictiones de longor a Youtube - e le prime parte del secunde emission - e ja arrivava commentarios!

Le maniera plus simple pro esser informate super nove "uploads" de Radio Interlingua in Youtube es, si on controla mi sito a Youtube:

http://www.youtube.com/user/petyko75

Alicunos me demandava super le versiones scripte del partes del programmas, ma io non pote dar los a illes, proque io ha delite le textos redactorial e io de facto non ha notate le interviews, etc.

Ma Youtube offere tamben subtitulos a su videos, que esserea multo bon pro comenciantes, qui poterea ascoltar le emissiones e parallelmente anque leger lo dicite, assi apprendente le orthographia, le pronunciation. Pro isto, como experimento io comenciava subtitular Radio Interlingua 1/2, i. e. le secunde parte del prime podcast de Radio Interlingua in Youtube; vide / lege los sub:

http://www.youtube.com/watch?v=Xa3Ge7fOXIw

Ma il ha nulle garantia, que io va continuar iste labor (i. e.: publicar Radio Interlingua in Youtube, notar le contentos plen del emissiones in scripto e/o facer subtitulos pro le versiones in Youtube), proque alora io deberea occupar me durante 24 (vinti-quatro) horas del die con Radio Interlingua...

In plus, Youtube es pro distribuer videos e non pro files sonic (como mp3, ogg, etc.); pro isto on debe facer alicun video - o projection de photos - a iste files sonic, como on pote vider al "video" Radio Interlingua 2/1:

http://www.youtube.com/watch?v=x9jWOmBNIQo

, in le qual io projectiona mi photos del 11me (dece-prime) Incontro Nordic de Interlingua in 2008, evenite in Linköping, Svedia.

Colliger e seliger photos, rediger los pro facer videos requirerea de me mesmo plus de tempore. Dunque: Radio Interlingua in Youtube debe remaner in le stadio de experimento, proque io non pote mesme facer le podcasts regularmente cata mense e in plus poner vetule emissiones a Youtube (adaptante los como files de video, con collectiones de photos), mesmo eventualmente subtitulante le "videos"...

Radio Interlingua no. 14 parla in e super le conferentia de interlingua in Germania

Car lectores de mi blog; car ascoltatores de Radio Interlingua!

Post un mense de retardo, finalmente io ha publicate le dece-quarte podcast de Radio Interlingua pro septembre 2009 (duo milles novem) in le nocte precedente...

Le contento es simple a describer, proque illo - ultra le musica e le orationes moderatori - contine solmente le interview con Sven Frank, que io ha facite con ille in Kirchheimbolanden (Rhenania-Palatinato, Germania) in le estate de 2009. Illac il habeva le conferentia international de interlingua e Sven Frank - secretario general de UMI - lo organisava. Io ha facite duo interviews con ille in "Kibo"; le prime al initio e le secunde al fin del conferentia. In le podcast no. 14 de "RI" vos pote ascoltar lo prime.

In le interview ille parla super le situation de interlingua in Germania (super le affaires de interlingua in relation german), super le intention de fundar UGI (le Union German pro Interlingua) durante le conferentia e super le programma planate del conferentia.

Si UGI vermente ha essite fundate in le conferentia e si le programma planate del conferentia se ha realisate e como, vos potera saper del sequente emission de Radio Interlingua (si vos non los ja sape de altere fontes, naturalmente... :-D ), in le qual io presentara le secunde interview con Sven, facite al fin del conferentia.

Bon passatempore pro vos con Radio Interlingua no. 14!

Get this widget | Track details | eSnips Social DNA

Parco pro feminas...

Iste weekend recente nos musicos ha visitate Germania, le mercato agricultural de Breitenbach (Rhenania-Palatinato, presso Kusel). Nos debeva musicar ibi sub le aere libere durante le jornos de sabbato e dominica; representante nostre urbe Zalaegerszeg, le partenario del urbe Kusel in Germania.

Durante le viage a un stop in un parco io ha observate un tabula con le inscription:

[de] Frauenparkplatz - bitte drei Plätze freihalten

[ia] Parco pro feminas - vole ben lassar tres placias libere

De facto il habeva tres placias libere vicin al tabula, ma non in le direction al qual le sagitta monstrava, ma in le direction opposite, ubi un altere tabula indicava, que illos es reservate pro handicapatos. E in le area, ubi le sagitta del tabula "pro feminas" se dirigeva in le autos parcante non era chauffeurs feminin, ma masculin (o - naturalmente - nulle chaffeurs).

Ben que il haberea essite bon pro iste blog, io non photographava le tabula, proque io judicava, que le inscription non se viderea adequatemente, essente de neon rubie con un fundo nigre, que alora non functionava - durante le jorno, in lumine de sol. E sur le tabula era glutinate micre papiros de reclamo, que coperiva alicun partes de litteras del inscription.

Un co-viagiante ha remarcate un altere tabula de iste sorta in un parco previe.

Io me (/vos) demanda, si le feministas luctava pro le existentia de tal tabulas in Germania o justo le differentiation de chaffeurs feminin las offende...?! On rarmente pote saper, si le distinction es que illas vole (le discrimination positive) o justo le equalisation de illas con le viros? Esque le existentia de tal tabulas in Germania es le resultato de alicun action feminista o illos ha nulle connexion con le feministas...?

A saper: le tabula e le tres placias pro le autos era in le initio del parco, le plus vicin al station de gasolina (includente le boteca, WC...) Forsan isto voleva esser un gesto...? O (/e) on voleva facilitar le parcamento de feminas per isto assi? Ma viste que - nos sape - feminas ha le plus problemas in conducer autos o parcar quando il se tracta de ir a retro ([de] rückwärts), iste problema non esserea solvite assi, proque le tres placias de parcar son al latere, dunque illas debe nonobstante ir a retro quando illas retorna e vole viagiar plus, lassante le parco... Ma justo le facto, que antea il non haberea autos parcante, si illas iva a retro volente lassar le parco suggere a uno, que isto es forsan a causa que illas non damnifica altere autos parcante durante le action...? (Ma al altere latere illas poterea incontrar se alora con autos in motion, que pote damnificar plus...)

Si io voleva esser malitiose, io ponerea le mesme question, que pone le articulo del mesme thema de un altere blog germanophone: http://buenalog.de/2007/09/21/eine-frau-kann-einparken: [de] "Eine Frau kann einparken, wenn mindestens drei Parkplätze frei sind?!" [ia] Un femina pote parcar quando al minus tres placias es libere?!" O il se tracta de isto, o del intention de assecurar tres placias pro tres autos (con conductores feminin)...? Que vos pensa super iste thema?

[ia] flipp-flopp... [hu] slatty

Regrettabilemente il pare, que tosto fini le saison de flip-flops. (A saper: flip-folps es un sorta de sandalias /plastic/, que se fixa al pede de uno / una...! per le pollice e isto es multo sexy a feminas (specialmente a juvenes!). Io pensa, originalmente flip-flops ha essite usate in le plagias, ma ora io crede non plus, ma tamben sur le stratas - in le estate o in grande calor. Io multissimo ama mesmo le sono accompaniante, quando illas vade in flip-flops...Io pensa, mesmo le nomine anglese flip-flop(s) vole imitar iste sonoritate...e il me place multo le verbo hungare imitative "slattyog" (pronuncia: shlattyog, šlatt'og, ubi le t' es longe!) pro describer iste sonoritate. :-)

Pro amantes del pedes feminin ecce alicun photos-tresores pro memorar iste saison que justo sta a finir usque le sequente estate... (Io voleva cercar pedes in flip-flops de feminas plus juvene - pueras - ma io trovava istos infra, de un topico de un foro hungare dedicate pro iste cosa e pro iste photos...! Forsan con le exception del prime duo, iste photos monstra pedes de feminas un poco - non multo! - plus "vetule" que io voleva haber...) Nonobstante, pro me esserea indifferente, mesmo anque disgustose si iste pedes in flip-flops era in calceas: le melior es pedes totalmente nude preferibilemente usque le coxas (dunque quando illas es in pantalones curte o in gonnas curte...), como il es observabile al prime duo photos...

Le ultime photo monstra un flip-flop plus evolvite; generalmente io intende non tales, ma flip-flops purmente plastic sin ulle ornamentos. Lo que es justo sexy in iste flips-flops non ornamentate, que il es evidente, que illos se faceva pro usar los sur le plagias, ma illas totevia non los usa solmente ibi, ma tamben sur le stratas - in le estate...